Pas detyrimeve për vaksinim, Macroni krahasohet me Hitlerin

 167 total views,  1 views today

Prokurorët në Francë kanë hapur hetime pas publikimit të një fotomontazhi në një rrugë, ku presidenti francez, Emmanuel Macron, shfaqet në uniformën dhe pamjen e liderit famëkeq nazist të Gjermanisë, Adolf Hitler.

Posteri, i cili qartazi është reagim ndaj politikës së qeverisë franceze për vaksinim për Covid-19, e shfaq presidentin francez me mustaqet e flokët e Hitlerit. Në poster shkruhet “Zbato, vaksinohu”, ndërsa shihet edhe stema e nazistëve, e modifikuar me inicialet e presidentit francez.

France Bleu, pjesë e mediumit publik, Radio France, raportoi se dy posterë të tillë janë shfaqur në ditët e fundit: njëri në qytetin bregdetar të Mesdheut, Toulon, dhe një tjetër në La Seyne-sur-Mer, shkruan Independent.

Ndryshe, Franca historikisht ka pasur nivel më të lartë të ngurrimit të popullsisë për t’u vaksinuar, por qeveria të hënën solli një projektligj që e bën të detyrueshëm vaksinimin për punëtorët e kujdesit shëndetësor, ndërsa ata që duan të shkojnë në restorante dhe vende të tjera duhet ta kenë pasaportën e Covid-it.

Sipas anketave, këto masa përkrahen nga shumica e francezëve, por te disa kanë shkaktuar zemërim. Dy qendra të vaksinimit u vandalizuan në pjesën jugperëndimore të Francës fundjavën e kaluar.

Të shtunën, mbi 100.000 njerëz marshuan në pjesë të ndryshme të Francës kundër rregullave të qeverisë për vaksinim.

Share
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •