Kryeministri Edi Rama, gjatë një interviste në Forumin Ndërkombëtar të Berlinit, ka zbuluar detaje mbi faktin sesi lindi ideja për ministren Diella.
“Në Shqipëri, ne themi se nevoja është mbret dhe për hir të nevojës kërkon zgjidhje, për të cilat nuk do të shkonte mendja, kështu ishte dhe ideja për krijimin e ministres Diella”.
Rama theksoi se qëllimi kryesor është të përshpejtohet procesi i integrimit të vendit në Bashkimin Europian, duke përdorur teknologjinë dhe inteligjencën artificiale.
Kryeministri rrëfeu gjithashtu bashkëpunimin me eksperten e teknologjisë, Mira Murati.
“E mora në telefon shqiptaren Mira Murati dhe i thashë se a e ndihmon dot Shqipërinë të ecë në rrugën e integrimit. I tregova se vendet që duan të bëhen pjesë e BE-së, duhet të punojnë fort me teknologjinë. Falë Mira Muratit, po punojmë për të përfunduar gjithë transfuzimin e ligjeve brenda 2027”,
Rama shtoi se projekti përfshin gjithashtu sistemin e prokurimit me inteligjencë artificiale dhe bashkëpunimin me ‘Microsoft’, për përmirësimin e shërbimeve publike.
Duke folur për rolin konkret të ministres Diella, Rama tha se ajo do të ketë 83 fëmijë, e secili do të jetë asistent për çdo anëtar të parlamentit të PS-së, do mbajnë shënim për çdo gjë që ndodh, do sugjerojë anëtarët e parlamentit dhe këta fëmijë do kenë informacione të mira për integrimin.
Sipas Ramës, ky sistem inovativ synon të sigurojë që çdo deputet të ketë mbështetje të drejtpërdrejtë për menaxhimin e informacionit dhe vendimmarrjen, duke e bërë administratën më efikase dhe më të lidhur me standardet europiane.
Ky projekt, siç theksoi Rama, është shembull i përpjekjeve të qeverisë për të përdorur teknologjinë në shërbim të qytetarëve.
“Ne duhet të shfrytëzojmë inteligjencën artificiale dhe sistemet digjitale për të ndihmuar institucionet tona të funksionojnë më mirë, duke e bërë çdo hap të qeverisjes më transparent dhe më efektiv”, deklaroi Rama.
