Show - Biz
Avokati godet punonjësin e sigurisë në Gjykatën e Vlorës, arrestohet në flagrancë
Një avokat është arrestuar në flagrancë nga Policia e Vlorës, pasi ka goditur fizikisht një punonjës sigurie brenda ambienteve të gjykatës. Ngjarja ka ndodhur gjatë një konflikti mes tyre në ambientet e Gjykatës së Shkallës së Parë të Juridiksionit të Përgjithshëm Vlorë.
Sipas njoftimit zyrtar të Policisë, Specialistët për Hetimin e Krimeve arrestuan shtetasin R. Ll., 42 vjeç, banues në Vlorë, me profesion avokat.
Konkretisht, rreth orës 12:30 të ditës së sotme, më 10 tetor 2025, avokati R. Ll. goditi me grusht në fytyrë punonjësin e sigurisë së objektit, shtetasin F. M., 60 vjeç. Si pasojë e goditjes, punonjësi i sigurisë ka pësuar dëmtime në fytyrë.
Avokati R. Ll. akuzohet për veprën penale “Goditjet për shkak të detyrës”.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme ligjore.