Albania
Vizita e Starmer në Tiranë për të kthyer Shqipërinë në kamp përqendrimi për emigrantët e paligjshëm në Britani, pas…
Vizita e djeshme e kryeministrit britanik Keir Starmer në Tiranë duket se vjen jo si për të përshëndetur një aleat strategjik, por si për të testuar durimin e shqiptarëve për një “bashkëjetesë të re” me emigrantët e paligjshëm të Britanisë.
Pas Italisë, duket se Shqipëria po promovohet me ngulm si plani rezervë për “skarcitetin njerëzor” që Londra s’e do. Rama i mohoi zyrtarisht kampet, por nuk fshehu flirtin diplomatik, një “dashuri” që mund të bëhet martesë, ose veç një aferë sezonale. Por në skenë, gjithçka ngjante si teatër i sofistikuar, por prapa perdes janë negociata të ftohta, me interes të lartë politik.
Megjithatë në fund të ditës, Shqipëria po përdoret si kartë në lojërat e brendshme elektorale të Britanisë, ndërsa Rama sërish luan mjeshtërisht rolin e të fortit që thotë “jo”, por lë gjithmonë derën hapur. Pra një marrëdhënie e re lind në Ballkan, me përqafime para kamerave dhe kontrata të paqarta në sirtar.
Detajet
Konkretisht kryeministri i Britanisë së Madhe, Keir Starmer, shkeli tokën shqiptare mëngjesin e së enjtes duke mbërritur në Tiranë në të parën vizitë zyrtare të tij, që i paraprin edhe takimit të Komitetit Politik Europian.
Kjo vizitë, për kryeministrin britanik është dëshmi se një kapitull i ri ka nisur në marrëdhëniet mes dy vendeve dhe se problemi i emigrantëve të paligjshëm shqiptarë në Mbretërinë e Bashkuar, që ka tensionuar jo pak herë raportet mes qeverive, është tej-kaluar.
“Fakti që unë, kryeministri i parë britanik që vij në Tiranë në këtë takim dy palësh, duhet të shihet edhe si një deklaratë qëllimi për mënyrën sesi ka krijuar një lloj force marrëdhënia jonë.