UK
VIDEO/Bosi i madh i drogës dënohet me 43 vite burg, kërcen para policisë gjatë arrestimit
Ky është momenti kur gangsteri britanik në arrati, Jamie Rothwell, kërceu një valle të çuditshme teksa arrestohej në fshehtinën e tij në Barcelonë. I njohur për “varësinë” nga hakmarrja, dhuna dhe zhvatja, ai u dënua sot me 43 vite burg pasi perandoria e tij milionëshe e drogës u rrëzua.
Rothwell, 38 vjeç, u arratis jashtë vendit në vitin 2015 pas një atentati me armë në një lavazh makinash, pjesë e një lufte të përgjakshme mes bandave rivale në Salford. Nga apartamenti i tij luksoz në Spanjë, ai përdorte rrjetin e fshehtë të mesazheve Encrochat për të urdhëruar sulme kundër rivalëve në Britani, ndërsa ekspozonte pamjet panoramike të Barcelonës.
Ai u arrestua nga policia spanjolle në maj 2020, në një operacion ku u filmua duke qeshur dhe kërcyer ndërsa çohej me pranga. Hetuesit e identifikuan si përdoruesin me pseudonimin “Live Long” në Encrochat, pas zbulimit të një selfie-je ku ai shfaqej duke ngritur dy gishtat.
Rothwell pranoi akuzat për konspiracion për posedim armësh dhe municionesh me qëllim rrezikimi të jetës, trafikim kokaine e ketamine, dhe dy akuza për konspiracion për shkaktim dëmtimi të rëndë trupor me dashje. Gjykata e dënoi me 18 vite burg për veprat e drogës dhe 21 vite për armët, plus 4 vite shtesë me kusht – në total 43 vite.
Gjatë karrierës kriminale, Rothwell ishte një figurë kyçe në konfliktin mes bandës “A-Team” dhe rivalëve “Anti A-Team” në Salford, ku u përfshinë të paktën shtatë të shtëna me armë, përfshirë përdorimin e AK-47, mitralozësh dhe granatahedhësish. Hetimet zbuluan se ai kishte trafikuar mbi 200 kg kokainë me vlerë mbi 7 milionë paund, si dhe armë të shumta.
Policia britanike dhe Agjencia Kombëtare e Krimit (NCA) e ndoqën dhe e arrestuan dy herë në Spanjë dhe Holandë. Sipas autoriteteve, Rothwell dhe banda e tij kishin përfituar “fitime marramendëse” dhe vepronin sikur ishin mbi ligjin. Tetë anëtarë të tjerë të grupit u dënuan me gjithsej 163 vite burg.
Gjykatësi e përshkroi Rothwell si “një kriminel profesionist” që udhëhiqte një operacion të nivelit ndërkombëtar dhe ishte i gatshëm të përdorte dhunë ekstreme për të ruajtur pushtetin dhe pasurinë. Ai po vuan dënimin në burgun e sigurisë së lartë Wakefield, i njohur si “Monster Mansion”.