Bota
Kjo është marrëveshja që Izraeli i propozoi Hamasit për t’i dhënë fund luftimeve në Gaza
Mediat izraelite pretendojnë sot se Izraeli ka propozuar një marrëveshje që do të lirojë të gjithë pengjet nga Rripi i Gazës në këmbim të “daljes së sigurt” të liderit të Hamasit, Yahya Shinwar nga enklava dhe përfundimit të luftimeve.
Sipas transmetuesit publik Kan, propozimi përfshin gjithashtu lirimin e të burgosurve palestinezë dhe një sistem të ri qeverisjeje për Gazën, por nuk u zbuluan detaje.
Gazeta Times of Israel raportoi se një zyrtar izraelit konfirmoi se ndërmjetësi midis familjeve të pengjeve dhe qeverisë, Gal Hirsch, ua prezantoi planin amerikanëve, të cilët do t’ia çojnë atë “zyrtarëve arabë” të paidentifikuar.
SHBA, Katari dhe Egjipti janë tre vendet që ndërmjetësojnë mes Izraelit dhe Hamasit. Kreu i grupit, Yahya Sinuar, nuk është parë në publik për një vit. Ai kërkohet nga Izraeli, i cili e konsideron atë “arkitektin” e sulmeve të 7 tetorit 2023 në tokën izraelite.
Kur u pyet për informacionin nga Kan dhe Times of Israel sot, zëdhënësi i qeverisë izraelite David Mensher nuk u përgjigj. Ai kujtoi deklaratat e mëparshme në të cilat vendi i tij i bëri thirrje komunitetit ndërkombëtar që të bëjë presion ndaj Hamasit për të bërë lëshime për të arritur një marrëveshje.
“Kushdo që dëshiron të kontribuojë në lirimin e pengjeve tanë duhet të bëjë presion mbi vrasësin Sinwar, jo mbi kryeministrin e Izraelit”, tha ai.