Mandatimi i Glauk Konjufcës, propozimi i dytë nga Lëvizja Vetëvendosje, për formimin e Qeverisë së re nga presidentja Vjosa Osmani ka nxitur reagime të shumta në skenën politike të Kosovës.
Partitë opozitare kanë përsëritur se vendi duhet të shkojë në zgjedhje të parakohshme. Sipas Partia Demokratike të Kosovës vendimi i presidentes Osmani është humbje kohe dhe thellim i krizës institucionale.
“Kriza e stërzgjatur e këtij viti, e shkaktuar nga Lëvizja Vetëvendosje, përveç dëmit politik, ka goditur çdo sektor, ndërsa rreziku që buxheti i shtetit të mos kalojë me kohë dhe që vitin e ardhshëm qytetarët të mbeten pa paga, e bën edhe më të domosdoshëm përshpejtimin e procesit drejt zgjedhjeve të reja”- thuhet në një deklaratë të PDK-së.
Lidhja Demokratike e Kosovës dhe Aleanca për Ardhmërinë e Kosovës thonë se nuk kanë votë për Konjufcën dhe asnjë qeveri të pakicës. Sipas tyre, vendimi i presidentes Osmani për mandatimin e nënkryetarit të LVV-së për kryeministër është zvarritje e qëllimshme për të shtyrë datën e zgjedhjeve të parakohshme.
“Glauk Konjufca, me mandatar të trashëguar në rrethanat e tanishme politike, duke kuptuar qartë dhe saktë vullnetin qytetar, duhet të jetë i sinqertë me veten. Më shumë dhe shumë më shumë sesa kryetari i tij. Të konstatojë se nuk ka shumicë për kryeministër”, u shpreh Lumir Abdixhiku, Kreu i LDK-së.
“Nuk e di se çfarë po tenton të bëjë LVV-ja. Pa një koalicion askush nuk e voton një mandatar kur nuk kanë një marrëveshje politike apo koalicion politik… Në asnjë formë nuk e ka obligim ndonjë parti e cila nuk është në qeverisje dhe as në ndonjë koalicion ta votojë qeverinë e huaj” , tha Time Kadriaj, Deputete e AAK-së.
Konjufca ka 15 ditë kohë , deri më 19 nëntor, për të paraqitur përbërjen e qeverisë së re para Kuvendit. Sipas Kushtetutës, nëse ai nuk arrin të zgjidhet kryeministër, duhet të shpërndahet parlamenti dhe presidentja Osmani të shpallë zgjedhjet e reja.
