Albania
Laboratori i kokainës në Greqi, zbulohen emrat e shqiptarëve të arrestuar dhe në kërkim! Kreu shqiptar ndodhet në Spanjë
Janë zbuluar emrat e tre shqiptarëve të arrestuar dhe atij në kërkim, mes 14 pjesëtarëve të një grupi ndërkombëtar të trafikut të kokainës, të zbuluar në Greqi.
Në Pikermi të Athinës, një operacion i forcave speciale greke EKAM çoi në zbulimin e një laboratori të prodhimit të kokainës nga lëkurat e kafshëve.
Policia kreu kontrolle në një depo dhe në një banesë. Në depo, një çerdhe e vjetër, ishte ngritur një laborator ku kryhej ndarja e kokainës që ishte zhytur në lëkurë të papërpunuar me kimikate. Disa nga të dyshuarit u kapën duke fjetur.
Importi i lëkurave nga Bolivia në Greqi, me procedura ligjore, u bë prillin e kaluar. Pastaj, paletat me lëkurat e kafshëve u transferuan në depon që karteli kishte marrë me qira në Pikermi. Atje, u gjetën afërsisht 300 kilogramë tretës kimikë që përdoreshin për të nxjerrë kokainën, nga kripërat me të cilat ishin zhytur lëkurat e thata të papërpunuara të lopëve.
“Ky është një proces veçanërisht kompleks, me specifika të rëndësishme teknike, i cili kërkon njohuri të specializuara të proceseve kimike, gjë që përforcon vlerësimin për organizimin dhe specializimin e lartë të ekipit”, tha drejtori i DAOE, Fotis Ntuitsis.
Laboratori i paligjshëm u gjet se përmbante afërsisht 100 kilogramë kokainë të përzier me kripëra, të cilat ishin nxjerrë nga 200 lëkura. Nga 1.500 lëkurat e mbetura të gjetura në paleta, sasia që grupi do të kishte prodhuar, pas ndarjes nga kripërat, vlerësohet të ketë qenë afërsisht 700 kilogramë.
“Lëkurat u importuan në vendin tonë nëpërmjet një kompanie me shumicë për mallra lëkure dhe mallra udhëtimi, të cilën e kishin krijuar vetë dhe u transportuan me automjete tregtare në një vend ku kishin instaluar një laborator të posaçëm kimik”, tha zëdhënësja e shtypit e policisë greke, Constantia Dimoglidou.
Truri pas transportit të lëkurave me kokainë nga Amerika Latine në Greqi konsiderohet një shtetas 45-vjeçar shqiptar, i identifikuar si Luis Murataj (Karteri), i cili nuk u arrestua dhe jeton në Spanjë.
11 persona u arrestuan nga policia në operacion: 6 grekë, 3 shqiptarë, 1 kolumbian dhe 1 bolivian.
3 shtetasit shqiptarë të arrestuar janë identifikuar si: Robert Muci, 41 vjeç, nga Shushica e Vlorës; Skënder Kallashi, 50 vjeç, nga Novosela e Vlorës; Ledvis Hoxha, 27 vjeç, nga Kutallia e Dimalit.