Aktorja franceze, Nadia Fares ka ndërruar jetë pasi u gjet pa ndjenja në pishinën e një palestre luksoze në Paris. 57-vjeçarja ishte e njohur për performancën e saj kryesore në trillerin psikologjik “The Crimson River” dhe ishte planifikuar të drejtonte filmin e saj të parë artistik këtë vit.
Dy vajzat e Fares njoftuan vdekjen e saj mbrëmjen e djeshme, duke treguar se ajo ishte mbytur në një klub sportiv të nivelit të lartë në zonën Blanche dhe Montmartre të kryeqytetit francez.
“Me trishtim të thellë njoftojmë ndarjen nga jeta të Nadia Farès këtë të premte. Franca ka humbur një artiste të madhe, por për ne, është mbi të gjitha një nënë që sapo kemi humbur”, shkruhej në njoftim.
Fundjavën e kaluar, aktorja ishte duke notuar në pishinë kur papritmas humbi ndjenjat. Disa minuta më vonë, një notar tjetër nxitoi për ta ndihmuar dhe vazhdoi përpjekjet për ta shpëtuar nëpërmjet CPR.
Ajo u dërgua me urgjencë në spitalin Pitie-Salpetriere dhe u vendos në komë. Ajo më vonë pësoi një atak kardiak dhe vdiq.
E lindur në Marok në vitin 1968, familja e Fares u zhvendos në jug të Francës kur ajo ishte fëmijë. Asaj iu ofruan rolet e saj të para televizive në fillim të viteve ’90 dhe u bë pjesë e skenës kryesore me filmin “Elles n’oublient jamais” (Ata kurrë nuk harrojnë).
Në trillerin emocionues, Fares luajti rolin e të dashurës së re të një burri të martuar, i cili bindet se ka një aferë jashtëmartesore.
Ajo krijoi një partneritet me regjisorin Bernie Bonvoisin pasi luajti rolin kryesor në komedinë e tij të vitit 1997 “Les Demons de Jesus”, duke bërë tre filma së bashku.
Por performanca përcaktuese e karrierës së Fares erdhi në filmin “Les Rivières pourpres” (Lumenjtë e Kuq) të Mathieu Kassovitz, në të cilin ajo luajti përkrah ikonës franceze Jean Reno.
Ajo luajti rolin e dyfishtë të motrave binjake Fanny Fereira dhe Judith Herault, dhe u vlerësua për praninë e saj unike në ekran. Në shesh xhirimi, Reno e shpëtoi atë nga një aksident potencialisht fatal kur një pjesë e pajisjeve u thye.
Fares u tërhoq nga aktrimi për një dekadë midis viteve 2007 dhe 2017, duke u zhvendosur në Los Angeles me bashkëshortin e tij, producentin e “Fast and Furious”, Steve Chasman.
Ajo nuk do të kthehej në Francë deri pas divorcit të saj, kur u zgjodh për të luajtur në komedinë Chacun sa vie (Jeta e të Gjithëve).
Pasi siguroi një rol të rëndësishëm aktrimi në serialin e Netflix- it “Marseille”, ajo pritej të dilte pas kameras dhe të drejtonte një film komedi më vonë këtë vit.
Fares ka qenë e hapur për problemet e saj shëndetësore, pasi i është nënshtruar tashmë tre operacioneve në zemër brenda katër viteve.
Në vitin 2007, ajo iu nënshtrua një operacioni në tru pasi pësoi një aneurizëm. Ajo la pas vajzat e saj Cylia dhe Shana Chasman.
