Show - Biz
Një futbollist nga Kosova zëvendëson Rrahmanin te Verona
Verona ka qenë “trampolina” e duhur për karrierën e kapitenit të Kosovës, Amir Rrahmani. Pas vetëm gjashtë muajsh te Verona, Rrahmani ka siguruar transferim te Napoli, të cilës skuadër do t’iu bashkohet në verë.
Rrugën e Rrahmanit tani pritet ta ndjekë një mbrojtës tjetër nga Kosova. Sipas gazetës së njohur kroate, Sportske Novosti, Ardian Ismajli mund të zëvendësojë Rrahmanin te Verona e Serie A.
Rrahmani verën e kaluar kaloi nga Dinamo e Zagrebit te Verona e më pas te Napoli. Ismajli luan për skuadrën tjetër të madhe kroate, Hajdukun e Splitit. Ndalesa për shkak të koronavirusit e ka dëmtuar shumë Ismajlin, që po kalonte formë të mirë.
Sipas SN, menaxhmenti i Veronas e sheh te Ismajli pasardhësin e Rrahmanit.
Ismajli 23-vjeçar tani udhëheq mbrojtjen e Kombëtares së Shqipërisë. Ai ishte larguar nga Kosova i pakënaqur me hapësirën që i ofrohej, raporton Koha.net.