Bota
“Skandal”, njohja e Kosovës nga Siria nuk pritet mirë në Beograd
Njohja e Kosovës nga Siria nuk është pritur mirë në Beograd. Media serbe e ka konsideruar “skandal” njohjen e Kosovës nga Republika Arabe e Sirisë këtë të mërkurë, më 29 tetor.
“Skandal: Siria njeh të ashtuquajturën Kosovë”, është titulli i artikullit të medias serbe “B92”.
Më pas artikulli vazhdon: “Damasku ka njohur zyrtarisht të ashtuquajturën Kosovë, njoftoi Ministria e Punëve të Jashtme Siriane. Një takim i përfaqësuesve të udhëheqjes së Sirisë, Arabisë Saudite dhe të ashtuquajturës Kosovë u mbajt në Riad të mërkurën.”
Lajmi i mirë për njohjen e pavarësisë së Kosovës nga Siria, u bë i ditur më herët këtë të mërkurë nga presidentja Vjosa Osmani. Në një njoftim në Facebook, Osmani tha se marrëveshja për njohjen e Kosovës nga Siria u arrit me mbështetjen e Princit të Kurorës së Arabisë Saudite, Muhammed bin Salman Al Saud, të mërkurën në Riad.
Ajo e falënderoi presidentin e Sirisë, Al Sharaa, për vendimin për njohjen e Kosovës si dhe për mbështetjen e tij për popullin e saj.
Që nga shpallja e pavarësisë, Kosova është njohur nga 120 vende.