Presidenti amerikan, Donald Trump tha të premten se Irani ka rënë dakord për gjithçka në bisedimet me Shtetet e Bashkuara, përfshirë punën e përbashkët për të hequr uraniumin e pasuruar nga vendi dhe për ta sjellë atë në SHBA.
Megjithatë, zyrtarët iranianë thanë se nuk ka plane që ata të heqin dorë nga rezervat e tyre të uraniumit të pasuruar.
“Jo. Jo trupa”, tha Trump në një intervistë telefonike me CBS, kur u pyet nëse përpjekja do të kërkonte trupa amerikane në terren. Presidenti tha se materiali përfundimisht do të transportohej në Shtetet e Bashkuara.
Kur u pyet për kohën, Trump tha se të dyja palët pritet të takohen këtë fundjavë dhe se SHBA-të do të vazhdojnë bllokadën e porteve iraniane derisa ta përfundojnë.
Irani mohoi se kishte rënë dakord për një marrëveshje që do të përfshinte transferimin e rezervave të tij të uraniumit të pasuruar.
“Uraniumi i pasuruar i Iranit nuk do të transferohet askund; transferimi i uraniumit në Shtetet e Bashkuara nuk ka qenë një mundësi”, tha zëdhënësi i ministrisë së jashtme të Iranit, Esmaeil Baghaei, për transmetuesin shtetëror iranian IRIB.
“Uraniumi i pasuruar i Iranit është i shenjtë për ne, ashtu si toka e Iranit”, tha Baghaei.
Ai shtoi se nuk ka asnjë paqartësi në lidhje me asnjë pjesë të negociatave. Sipas tij ata kanë deklaruar qartë qëndrimet.
Trump i tha gjithashtu CBS se Irani kishte rënë dakord të ndalonte mbështetjen e grupeve terroriste, përfshirë Hezbollahun dhe Hamasin.
Presidenti të premten shprehu vazhdimisht besimin se një marrëveshje do të arrihet brenda një ose dy ditëve të ardhshme dhe se bisedimet e paqes ka të ngjarë të mbahen këtë fundjavë.
