Komisioneri Shtetëror i Zgjedhjeve, Ilirjan Celibashi gjatë prezantimit në seancën plenare të Kuvendit të Shqipërisë të raportit vjetor për veprimtarinë e KQZ-së gjatë vitit 2020, deklaroi në Kuvend se 5 mijë emigrantë u lanë jashtë procesit të votimit për zgjedhjet e 25 prillit.
Ai shtoi se 5 mijë qytetarët me të drejtë vote deklaruan adresën e tyre të përhershme jashtë shtetit dhe janë ligjërisht votues emigrantë, por kësaj radhe nuk e patën të drejtën e votës.
Komisioneri Shtetëror i Zgjedhjeve, Ilirjan Celibashi tha se mungesa e konsensusit të gjithë faktorit politik ishte arsyeja pse nuk votuan emigrantët.
“Ishte çështje kohe dhe e mungesës së konsensusit të gjithë faktorit politik mbi rregullat që duhet të miratonte KQZ. Kemi të regjistruar rreth 5 mijë qytetarë me të drejtë vote që kanë deklaruar adresën e tyre të përhershme, pra votues ligjërisht emigrantë. Ky është numri. Ata u lanë jashtë, ishte çështje kohe”, tha ai.
“KQZ ka përpunuar të gjitha të dhënat që janë marrë nga emërimet dhe lëvizjet e anëtarëve të komisioneve të niveleve të ndryshme dhe rezulton se ndryshimi është bërë një trend i konsoliduar që ndikon drejtpërdrejtë në mënyrën e administrimit të proceseve zgjedhore. Kodi Zgjedhor ka parashikime në lidhje me ushtrimin e të drejtës së votës të emigrantëve, por vetëm kaq, pasi i gjithë seti tjetër i rregullave në këtë aspekt nuk është i plotësuar”, tha ndër të tjera Celibashi.
Celibashi raportoi për punën e KQZ-së gjatë vitit 2020.
“Veprimtaria e KQZ për 2020 ka qenë e varur dhe kushtëzuar nga kushtëzimet e debatet për pandeminë e kodin zgjedhor. Në fokus qendror për 2020 ka qenë plotësimi dhe reflektimi e qasja ndaj rezolutës së Kuvendit në lidhje me raportin për 2019. Sipas rezolutës, është kërkuar nga KQZ të miratojë një databazë në lidhje me shtetasit shqiptarë me të drejtë vote të angazhuar në administratën zgjedhore”, vuri në dukje ai.
Sipas tij, KQZ ka miratuar 83 formularë vetëdeklarimi për vakancat në këshillin bashkiak, 39 kandidatë janë burra dhe 33 kandidate gra. Në 2020 refuzuan depozitimin e formularit të vetëdeklarimit 38 kandidatë të subjekteve politike.
“KQZ emëroi 34 auditues për zgjedhjet e 30 qershorit, për shpenzimet në fushatë. Ekspertët financiarë duhet të dorëzonin raportet. 22 parti nga 36 në zgjedhje depozituan raportin financuar për shpenzimet në fushatë. Në përfundim të këtij procesi, janë vetëm 14 parti që e dorëzuan brenda afatit, të tjerat më vonë. KQZ iu dorëzuan fonde, sipas ligjit përkatës, nga tetori deri në 31 dhjetor për 2020 më së shumti kjo veprimtari konsiston me përgatitjet e zgjedhjeve të 25 prillit. Hartuam plan veprimi. Ndryshimet e shumta të bëra në Kodin Zgjedhor, 7 muaj para zgjedhjeve, diktuan detyra në periudhë mjaft të shkurtër”, vijoi Celibashi.
“Fokusi kryesor në këtë periudhë ishte realizimi projekti i identifikimit biometrik dhe votimi elektronik. Vlerësojmë bashkëpunimin e KQZ me partnerët ndërkombëtare. Qeveria na mbështeti me buxhet. Në përfundim mund të thuhet se KQZ përmbushi të gjitha detyrimet nga Kodi Zgjedhor, përfshirë këto në rezolutën përkatëse’’, tha Celibashi.
