Administrata publike vijon të fryhet. Me zgjedhjet parlamente të vitit të ardhshëm në prag, dhe pagat që joshin më shumë, numri i atyre që punojnë në ministri apo drejtori ka arritur në mbi 86 mijë. Në krahasim me fillim-vitin, janë 800 rrogëtarë më shumë në administratën publike qendrore.
“Historia e të punësuarve në administratën publike, unë shpesh e them që është ose për ata që duan të zhvillohen në karrierë ose për ata dembelë. Fatkeqësisht shteti është kthyer në hapësirë punësimi militantësh të njërës apo tjetrës parti”, thotë për televizionin A2 Helena Halilaj, pedagoge, eksperte e tregut të punës.
Bazuar te historiku i vendimeve, pjesa më e madhe e atyre që janë punësuar këtë vit janë nëpunës të thjeshtë, ndjekur nga drejtuesit e kategorisë së ulët dhe ata të mesëm. Ndërkohë ka pak punësime në nivelet e larta dhe këtë hezitim ekspertë të tregut të punës e lidhin me hetimet e Prokurorisë së Posaçme Kundër Krimit të Organizuar dhe Korrupsionit.
“Mosplotësimi i vendeve bosh vihet re veçanërisht te kategoritë e mesme dhe të larta të specialistëve. Kjo nga frika e SPAK. Kanë frikë se firmat e hedhura mund t‘iu sjellin pasoja ligjore”, thotë Halilaj.
Në total, me gjithë bashkitë, administrata publike shqiptare përbëhet nga mbi 184 mijë punonjës. Këtë vit, shpenzimet për të paguar rrogat e tyre janë planifikuar në masën 119.7 miliardë lekë. Kjo shifër është sa 5 për qind e gjithë Prodhimit të brendshëm bruto të Shqipërisë në një vit. Kjo në një kohë që pas digjitalizimit, qeveria ka shpallur si objektiv përfshirjen e Inteligjencës Artificiale në ofrimin e shërbimeve publike.
