Bllokim pronash e ndalim hyrjeje në Shtetet e Bashkuara të Amerikës.
Janë këto dy nga sanksionet që parasheh urdhri amerikan ndaj personave që shënjestrohen si destabilizues në vendet e Ballkanit Perëndimor.
Ky urdhër i nënshkruar nga presidenti Joe Biden, që specifikisht përmend Shqipërinë, përcakton sanksione ndaj zyrtarëve e ish-zyrtarëve të përfshirë në korrupsion.
Mesazhet e dekretit amerikan për korrupsionin i vlerëson të fuqishme profesori i marrëdhënieve ndërkombëtare, Dritëro Arifi.
Përveç kësaj, ai sheh edhe një porosi kundër Bashkimit Evropian.
“Mesazhi tjetër shumë i rëndësishëm është kundër nacionalizmave shumës, atij serb, kroat, shqiptar e kështu me radhë. Në njëfar mënyre ky mesazh e përçoi edhe që nuk do të ketë ndryshim të kufijve në Ballkanin Perëndimor, të paktën jo në këtë politikë të cilën është duke e ndjekur administrata Biden. Por, këtu e kemi edhe një mesazh mes rreshtave edhe kundër Bashkimit Evropian për shkak të paaftësisë së tyre me zgjidhë problemin qe sa dekada në Ballkanin Perëndimor”, ka thënë Arifi.
Mirëpo BE-ja ka thënë se nuk do ta ndjekë shembullin amerikan të sanksioneve, pasi ka detyrimet e saj ndaj partnerëve në rajon.
“Angazhimi ynë në rajon është shumë i fortë. Bisedimet rreth sanksioneve të mundshme nuk janë në rendin e ditës. Çdo vendim mbi këtë duhet të merret unanimisht nga të gjitha vendet anëtare. Për momentin, kjo nuk po diskutohet kur bëhet fjalë për partnerët në Ballkanin Perëndimor”, është shprehur Peter Stano, zëdhënës i BE-së.
Në listën e zezë të saj Amerika ka paralajmëruar se do t’i fusë ata që pengojnë zbatimin e marrëveshjeve ndërkombëtare që lidhen me Ballkanin Perëndimor, si ato të Prespës, Ohrit e Dejtonit, përfshirë Rezolutën 1244 të OKB-së.
Sanksione përmenden edhe në rast se pengohet ndonjë marrëveshjeje ose kornizë e njohjes reciproke.
E ky, sipas profesorit Arifi, është mesazh i qartë për Kosovën dhe Serbinë se nuk mund t’i ikin njohjes së njëra-tjetrës.
“Vetëm një marrëveshje me njohje të ndërsjellë. A ka me pas në mes konpromise, po gjithsesi por në fund do të rezultojë me njohje reciproke sepse është e vetmja alternativë që Ballkani Perëndimor jo vetëm që do të integrohet politikisht por edhe në aspektin ekonomik”, ka shtuar profesori Arifi.
Kurse për mospërmendjen e Pakos së Ahtisarit, Arifi thotë se në vitin 2001, kur është krijuar urdhri, nuk ka ekzistuar Pakoja.
Në Qendrën Kosovare për Studime të Sigurisë urdhrin e vlerësojnë si mbështetje karshi përpjekjeve për sundim të ligjit në vendet e Ballkanit.
“Prokuroria pastaj të ketë një obligim më të madh që të operojë edhe në bazë të listave të përpiluara sepse siç dihet në të kaluarën megjithëse ka pasur emra të listuar në këto lista jo domosdo këta persona kanë qenë të ndjekur nga ana e organeve ligjore”, ka pohuar Mentor Vrajolli, drejtor i Qendrës Kosovare për Studime të Sigurisë.
Në listën e zezë të Amerikës vazhdojnë të jenë emrat e disa prej ish-komandantëve të UÇK-së. Muajin e kaluar SHBA-ja ua ndaloi hyrjen në territorin amerikan ish-presidentit dhe ish-kryeministër i Shqipërisë, Sali Berisha, dhe familjes së tij, me arsyetimin se janë të përfshirë në afera korruptuese.
