Parlamenti gjerman do të votojë të enjten pasdite në seancë plenare për qëndrimin e Gjermanisë në Këshillin Evropian të tetorit. Televizioni publik ka siguruar draftin që do të votohet, kalimi i të cilit me shumicë nga ligjvënësit gjermanë, të enjten në seance plenare do të thotë një PO të drejtpërdrejtë në Këshillin Evropian nga Gjermania për Shqipërinë, sipas nenit 9 të Ligjit për Bashkëpunim ndërmjet Qeverisë Federale dhe Bundestagut gjerman në çështjet e BE-së, por varësi të lejimit të mëtejshëm të procesit të negocimit.
Drafti i miratuar të martën nga CDU/CSU kërkon çeljen e negociatave duke njohur se Shqipëria i ka çuar më tej përpjekjet e saj për reforma dhe ka bërë përparim në kriteret kyçe. Bundestagu gjerman mbështet perspektivën e Shqipërisë në BE, thuhet në dokument dhe vlerëson pavarësisht gjithë mangësive përpjekjet për reforma në vend. Procesi i anëtarësimi është një shtytës vendimtar për reformat dhe stabilitetin në rajon, shkruan dokumenti bashkë me faktin që Shqipëria i jep procesit të afrimit në BE një përparësi shumë të lartë si dhe motivimi i këtij vendi të NATO-s për t’u anëtarësuar në BE është i lartë. Këto duken motivet qendrore mbi të cilat do të duhet të shprehen si politikë e jashtme ligjvënësit gjermanë, të cilët nga ana tjetër, kanë specifikuar për qeverinë e tyre monitorimin e disa parametrave që ata i gjykojnë të nevojshme të ndiqen në vazhdim përkundrejt proceseve negociuese me Shqipërinë.
Një po shumë e mundshme e nesërme në parlamentin gjerman pas dakordësisë CDU CSU, është megjithatë një nga pjesët e qëndrimit të vendeve anëtare, referuar situatës me vendet skeptike të dy muajve më pare, Francë e Holandë. Pak javë më pare, presidenti francez e përkufizoi Ballkanin si vend Brenda kufijve të BE-së, duke paralajmëruar një qëndrim të ndryshuar në tetor, por për të cilin ende nuk është mësuar më shumë.
