Ka nisur në ambientet e Kuvendit të Republikës së Shqipërisë mbledhja mes parlamentarëve të Shqipërisë dhe Kosovës. Ceremonia nisi me himnin e Kosovës për t’u pasuar me atë kombëtar shqiptar.
Ligjvënësit e të dy vendeve e ngritën në këmbë për të nderuar himnet kombëtare përpara se të niste seanca e jashtëzakonshme plenare.
Përfaqësuesi i parë kosovar i cili mori fjalën në mbledhjen e përbashkët Kosovë-Shqipëri që po zhvillohet në Tiranë, ishte kreu i Kuvendit në Prishtinë Glauk Konjufca.
Kreu i Parlamentit kosovar nënvizoi rëndësinë e kësaj datë për të gjithë shqiptarët, duke kujtuar si pikërisht domethënie e kësaj date të shënuar ka qenë ylli polar i të gjithë dëshmorëve të rënë për liri, duke filluar nga heroi Adem Jashari.
Duke marrë shkas nga dita e lindjes së heroit nga Prekazi që përkon pikërisht me 28 nëntorin, Konjuca beri një paralelizëm midis ikjes të okupatorit osman nga Shqipëria me largimin e okupatorit serb nga Kosova, pothuajse një shekull më vonë.
Por përpos ditës festive, kreu i Parlamentit kosovar kujtoi edhe se “po aq sa festojmë sot duhet të reflektojmë për pengesat”, duke parë edhe nga situatën e ndërlikuar ndërkombëtare dhe në rajon. “Bota sot më e pasigurtë nga Rusia, i vetmi vend në Europë i lidhur me Moskën është Serbia. Ajo na lufton nga brenda dhe jashtë, nga diplomacia te kontrolli i grupeve kriminale. Sa më afër Shqipëria me Kosovën, aq më shumë do të mbrojmë interesat e kombit”, tha ai, duke kujtuar orientimin “ e pa rezervë të Kosovës në BE, brenda NATO-s, në miqësi të përhershme me SHBA”.
Në një fjalim emocionues, kryeparlamentarja Lindita Nikolla nënvizoi thirrjen “Një komb, një qëndrim”, duke sjellë në vëmendjen datat që kanë shënuar historinë tonë.
“Një komb një qëndrim, atë të vëllazërimit Shqipëri-Kosovë në vigjilje të 28 nëntorit. Kumti na mbush me ndjenja të fisme, me krenari kujtime e refleksione për atë që ishim dhe bënë, atë jemi dhe duam dhe atë që do t’u lëmë trashëgimi fëmijëve. Ditë e paharrueshme sot ku dy kuvendet mblidhen për të kremtuar ngritjen e flamurit të Skënderbeut nga babai i kombit Ismail Qemali në 1912 në Vlorë.
Ekzistencën, territorin, gjuhën dhe identitetin na e vinin në diskutim. Nga Prizreni e Vlora, Tirana e Prishtina nga Korça e Presheva nuk i ikën privilegjit e nderit që iu dha emri shqiptar. U bënë shqiptarët qytetarë të denjë të qytetërimit që i përkasin pa dallim feje, krahine e ideje iu falën flamurit kombëtar. Shqipëria e Kosova janë dy shtete të pavaruara me miq e aleatë të mëdhenj me aspiratë integrimin në BE. Është vendi i duhur për të kujtuar ata që krijuan kongresin e Lushnjës, ata që luftuan kundër okupatorëve. Martirët e burgjeve komuniste, të gjithë ata që nuk e humbën beismin te liria po kaq edhe studentët e dhjetorit 1990”.
Nikolla theksoi se është përgjegjësi e dy kuvendeve për t’i shndërruar kufijtë në kufij formalë.
“Histoira nuk është rrëfim por edhe shkollë. Kemi qenë të ndarë me mur por në gëzime e vaje kemi pasur në vetëdije njëri-tjetrin. Përgjegjësi për t’i shndërruar kufijtë në kufij informalë dhe për këtë një rol vendimtar kanë dy kuvendet tona. Shqiptarët kudo që janë do të bëjnë më të mirën”.
