Projektligji për legalizimin e kanabisit për përdorim mjekësor ka ngjallur jo pak debat në vend, ku një pjesë e opinionit e konsideron si vendim pozitiv, ndërsa ka edhe nga ata që e shohin me skepticizëm.
I ftuar në studion e emisionit “Publikisht” të Blerta Tafanit në RTSH, opinionisti dhe gazetari Mentor Kikia tha se ky projektligj anatemohet për shkak të historikut “problematik” të vendit tonë me kanabisin. Megjithatë ai theksoi se nuk bëhet fjalë për kanabisin që mbillet sot ilegalisht në vend, duke sqaruar se kanabisi për qëllime mjekësore ka parametra specifike.
“Anatemohet sepse kemi një historik shumë problematik me kanabisin, me trafikun, kriminalitetin që ka prodhuar, me deformimin që i është bërë ekonomisë etj.. E rëndësishme është të qartësohen shumë gjëra që kanë të bëjnë me këtë proces sepse në fillim u fol për legalizim pa dhënë informacione. Kur bëhet fjalë për kanabis për qëllime farmaceutike, nuk bëhet fjalë për kanabisin e egër që mbillet sot ë Shqipëri dhe nuk bëhet fjalë për ta shitur as boçe as gjethe as në ndonjë mënyrë tjetër, por për kanabis që është specifikisht i paracaktuar si farë nga ata që bëjnë përpunimin e nëproduktit. As në Shqipëri as në Ballkan nuk ka kompani farmaceutike që mund ta shndërrojnë kanabisin në ilaç. Janë kompani të mëdha ndërkombëtare që kanë marrëveshje me kompani që e kultivojnë këtë kanabisin farmaceutik dhe marrin nënproduktin për ta përpunuar dhe prodhuar medikamentet. Nuk është kanabisi që mbillet sot nëpër ferra, kanabisi farmaceutik ka parametra teknologjikë rreptësishtë agresivë”, tha Kikia.
Mjekja toksikologe, Esmeralda Thoma sqaroi se kanabisi mjekësor nuk kuron asnjë sëmundje, por përdoret për trajtimin e disa simptomave të disa sëmundjeve. Ajo u shpreh se bima e kanabisit ka rreth 100 substanca aktive dhe një pjesë e tyre përdoren tashmë në mjekësi.
“Kanabisi mjekësor nuk kuron asnjë sëmundje. Kanabisi mjekësor përdoret për trajtimin e disa simptomave të veçanta të disa sëmundjeve që janë kryesisht sëmundje terminale. Nëse do përdoret kanabisi mjekësor, nuk është më vetëm në formë vaji, varet nga lloji i sëmundjes që do të trajtojë. Bima e kanabis ka rreth 100 substanca aktive që një pjesë përdoren në mjekësi. Dy substancat kryesore që përdoren është kanabidioli që është ai që thuhet vaji i hashashit dhe nëntetrahidrokanbinoli që është substanca që ka potencialin e madh abuzues”, theksoi Thoma.
Bardhi Sejdarasi, redaktor në RTSH, tha se kushtet e kompanive që duhet të hyjnë në këtë treg janë shumë të vështira, teksa shtoi se do të jetë e vështirë për ta që të marrin pjesë.
“Ligji është një nga ligjet që qëndroi nga qershori i 2022 deri në mars të 2023 në konsultim publik dhe gjatë këtyre muajve nuk pati asnjë koment. Nuk merr në konsideratë legalizimin e bimës së kanabisit, merr vetëm kontrollin dhe çuarjen në një destinacion të caktuar të kësaj bime, siç është prodhimi i produkteve medicinale. Janë rreth 12 sëmundje që kurohen me këtë gjë. Jemi shteti i 40 që kërkojmë të kemi një treg të kontrolluar. Kushtet e atyre që duhet të hyjnë në këtë treg janë shumë të vështira për t’u kapur dhe unë mendoj se do të jetë e vështirë për kompanitë që të marrin pjesë. Kompania duhet të ketë në total 1 mld lekë, duhet të përfshijë disa cilësi, duhet të jetë e njohur në Europë. Nuk del kushdo që mbjell kanabis pasi do licencohet kompania që sjell farën”, tha Sejdarasi.
