Për gati 45 vite, këto shtigje ishin të blinduara me ushtarë dhe roje kufitare, një zonë e ndaluar, ku kalimi ishte i paimagjinueshëm.
Por që prej vitit 2012, “Majat e Ballkanit” janë kthyer në një nga rrugët më të frekuentuara të ecjes malore në Europë.
Ky shteg i famshëm që lidh e bashkon tre shtete Shqipërinë, Kosovën dhe Malin e Zi përshkon të ashtuquajturat “Bjeshkët e Namuna”, duke ofruar një aventurë mahnitëse prej 197 kilometrash në zemër të peizazheve më të egra dhe më të bukura që ofron Europa.
Një nga segmentet më të njohura të këtij udhëtimi kalon nga treva shqiptare e Vuthajve në Mal të Zi drejt Thethit. Udhëtimi nuk është vetëm natyrë e paprekur, por edhe kujtesë e fortë e së shkuarës: bunkierë të fshehur, vende ku qëndronin rojet kufitare dhe piramida që dikur shënonin vijën e pakalueshme mes Shqipërisë komuniste dhe ish-Jugosllavisë.
Për të huajt, kjo eksperiencë është shumë e lodhshme, por e paharrueshme.
“Kemi ardhur të hënën në Shqipëri, pastaj u ngjitëm dhe kaluam sërish në Mal të Zi, 4 ditë aty dhe tani po kthehemi në Shqipëri sërish përmes maleve. Do festojmë ditëlindjen e një shoku në Tiranë. Malet janë madhështore, të thepisura, por edhe të lodhshme”, tha një turist.
“Ne vijmë nga Anglia dhe Danimarka dhe erdhëm këtu për hiking. Kërkuam një vend ku mund të eksplorojmë dhe të bëjmë ngjitje për disa ditë me radhë në Alpe, prandaj jemi këtu. Natyra është fantastike mes alpeve me dëborë dhe shkëmbinjve, këtu ka edhe një liqen”, u shpreh një turist tjetër.
“Kam vizituar Alpe të ndryshme në botë, por këtu është krejtësisht ndryshe. Jam i impresionuar. Kam ardhur disa herë në Shqipëri dhe natyra në bjeshkë më duket përherë më e veçantë”, u shpreh një vizitor i huaj.
Alpet Shqiptare janë më të bukurat, por edhe më të veçantat, dhe vecantia e tyre qëndron në faktin se në të katër anët rrethohen sërish nga toka shqiptare: në njërën anë nga trojet shqiptare të Plavës e Gucisë në Mal të Zi, dhe në krahun tjetër me bjeshkët e Rugovës në Kosovë.
