Rreth 3,000 pacientë në ditë në Angli janë detyruar muajin e kaluar të marrin trajtim në korridore spitalore ose në hapësira të improvizuara, sipas të dhënave të publikuara për herë të parë nga NHS.
Shifrat tregojnë përmasën e krizës në sistemin shëndetësor britanik, të cilën ministrat e kanë cilësuar si “të pasigurt” dhe “të papranueshme”.
Sipas përkufizimit, “trajtim në korridor” ndodh kur pacientët kalojnë më shumë se 45 minuta duke u trajtuar në zona jo të përshtatshme si korridore, dhoma anësore, apo madje edhe parkingje, ose kur mbeten pranë pavioneve pa shtrat të caktuar.
Mesatarisht, gjatë muajit maj, 2,241 pacientë në ditë u trajtuan në korridore brenda urgjencës (A&E), ndërsa 669 të tjerë përjetuan të njëjtën situatë brenda pjesëve të tjera të spitaleve.
Analiza e NHS tregon se 20 spitale përbëjnë më shumë se gjysmën e rasteve në A&E, ndërsa 20 të tjera dominojnë rastet në zona të tjera të spitaleve.
Pacientë dhe staf mjekësor kanë përshkruar situatën si jashtëzakonisht të vështirë. Një familjare nga East Midlands tha se nëna e saj 80-vjeçare ka pritur mbi 24 orë në korridor gjatë disa vizitave në urgjencë, duke e përshkruar ambientin si “si një zonë lufte”.
Ajo shtoi se e moshuara shpesh merrte ndihmë vetëm kur familjarët ishin të pranishëm, duke ngritur shqetësime për cilësinë e kujdesit në këto kushte.
