Andy Burnham ka hyrë zyrtarisht në një fazë vendimtare të karrierës së tij politike pasi u zgjodh deputet i Partisë Laburiste në zgjedhjet e pjesshme të së enjtes, duke i hapur rrugën një sfide të mundshme për drejtimin e partisë dhe postin e kryeministrit të Mbretërisë së Bashkuar që mbahet nga Keir Starmer.Burnham do të ketë të drejtën formale për të hyrë në garën për lidership. Sipas rregullave të partisë, çdo kandidat duhet të sigurojë mbështetjen e të paktën 20% të deputetëve laburistë, që përkthehet në rreth 81 deputetë.
Nëse ai vendos të nisë lëvizjen para afatit të 16 korrikut, do të duhet të sigurojë menjëherë mbështetjen e nevojshme, përpara se parlamenti të hyjë në pushimin veror.
Nga ana e tij, Keir Starmer ka konfirmuar se është i gatshëm të rikandidojë dhe të përballet me çdo sfidë brenda partisë.
Dinamika brenda Partisë Laburiste
Përzgjedhja e liderit të ri, në rast se hapet gara, përfshin disa faza: mbështetje nga deputetët, më pas nga degët lokale dhe sindikatat, dhe në fund votimin e anëtarësisë së partisë. Procesi mund të zgjasë dy deri në tre muaj.
Burime brenda partisë sugjerojnë se Burnham mund të shtyjë lëvizjen e tij për pas verës, në mënyrë që të fokusohet edhe në zgjedhjet lokale dhe në konsolidimin e mbështetjes brenda Westminster-it.
Sfidues të tjerë të mundshëm
Në skenën politike britanike përflitet edhe një tjetër emër si sfidues i mundshëm. Wes Streeting ka deklaruar se Starmer duhet të qartësojë pozicionin e tij, përndryshe mund të hyjë edhe ai në garë për lidership.
Nëse do të zhvillohej një përballje mes Starmer, Burnham dhe Streeting, sondazhet paraprake sugjerojnë se Burnham do të dilte më i favorizuar.
