Moska është goditur nga sulmi më i madh ukrainas që nga nisja e luftës në shkallë të plotë, me afro 200 dronë që kanë goditur objektiva në dhe rreth kryeqytetit rus, duke shkaktuar kolona të dendura tymi që u ngritën lart në qiell.
Sipas guvernatorit të rajonit të Moskës, Andrei Vorobyov, 17 persona janë plagosur si pasojë e sulmeve.
Ministria ruse e Mbrojtjes deklaroi se gjatë 24 orëve të fundit forcat ruse kanë interceptuar dhe shkatërruar pothuajse 1.000 dronë ukrainas dhe katër raketa lundruese në mbarë vendin. Një depo nafte në rajonin jugor të Rostovit u godit nga sulmet, ku një person humbi jetën.
Presidenti ukrainas, Volodymyr Zelensky, tha se Kievi kishte goditur sërish rajonin e Moskës me ato që ai i quajti “sanksione me rreze të gjatë veprimi”, një term që përdoret për sulmet ukrainase në thellësi të territorit rus.
“Ka ardhur koha që kjo luftë të marrë fund dhe Rusia duhet të ndërmarrë hapat e nevojshëm diplomatikë”, deklaroi Zelensky.
Ai shtoi se sulmi masiv me dronë ishte një përgjigje ndaj sulmit rus të javës së kaluar ndaj Kievit, gjatë të cilit u përfshi nga flakët një monument i rëndësishëm fetar në kryeqytetin ukrainas.
