Kina po përballet me një problem të ri ndërsa vazhdon të përballet me pasojat e tajfunit Noul dhe përmbytjeve të fundit. Përveç dëmeve të shkaktuara nga moti ekstrem, autoritetet kineze po luftojnë edhe me një valë videosh të rreme të krijuara nga Inteligjenca Artificiale (IA), të cilat po përhapen në rrjetet sociale dhe mund të shkaktojnë panik te publiku.
Gjatë muajve të fundit, ndërsa stuhitë e fuqishme dhe përmbytjet kanë goditur zona të ndryshme të Kinës, në internet janë shfaqur materiale të manipuluara që paraqesin situata të pavërteta. Disa video kanë treguar në mënyrë të rreme trupa të pajetë në ujërat e përmbytjeve, zona të prekura nga katastrofa që në realitet nuk ishin dëmtuar, si dhe pamje të falsifikuara të operacioneve të shpëtimit.
Në disa raste, informacionet e rreme për ndërprerje të energjisë elektrike kanë shkaktuar frikë te banorët, duke i shtyrë ata të blejnë me nxitim ushqime dhe furnizime emergjente.
Një tjetër rast lidhet me përmbytjet në qytetin Hengzhou, në provincën Guangxi, në fillim të korrikut. Përmbytjet reale shkaktuan arratisjen e qindra gjarpërinjve nga një fermë rritjeje, por më pas u shpërndanë edhe imazhe false që pretendonin se krokodilë ishin lëshuar në lumenj, duke rritur frikën mes banorëve.
Autoritetet kineze paralajmërojnë se këto materiale të krijuara me AI mund të komplikojnë situatat emergjente, ku tashmë ka operacione shpëtimi, evakuime masive dhe përpjekje për të mbrojtur jetën e njerëzve.
Huang Zhihua, zyrtar i Departamentit të Policisë së Zhejiang për sigurinë publike online, deklaroi se shumë krijues të përmbajtjeve përdorin lajmet për fatkeqësi natyrore për të tërhequr vëmendjen dhe për të fituar më shumë ndjekës.
“Përmbajtjet më sensacionale ose të ekzagjeruara marrin më shumë pëlqime dhe shikime. Disa persona po krijojnë qëllimisht informacione të rreme vetëm për të tërhequr vëmendjen e publikut”, tha ai.
Në javët e fundit, autoritetet kineze kanë ndërmarrë masa ndaj personave që kanë publikuar lajme dhe video të rreme, duke përfshirë ndalime, procedime penale dhe gjoba.
Megjithatë, ekspertët paralajmërojnë se përdorimi i gjerë i Inteligjencës Artificiale mund të sjellë një krizë të re globale të keqinformimit. Ata theksojnë se aftësia për të krijuar video shumë realiste me pak mjete mund ta bëjë gjithnjë e më të vështirë dallimin mes informacionit të vërtetë dhe manipulimit.
Për Kinën, sfida tani nuk është vetëm përballimi i stuhive dhe përmbytjeve, por edhe mbrojtja e publikut nga një valë e re e mashtrimeve digjitale.
