“Një Festival me vlera të jashtëzakonshme” e ka konsideruar këngëtarja Eneda Tarifa Festivalin Folklorik Kombëtar të Gjirokastrës. E ftuar në emisionin “Publikisht”, i cili u zhvendos pikërisht në skenën e Festivalit, Tarifa e përshkroi prezantimin e 2 netëve të tij si një eksperiencë mjaft emocionuese dhe të veçantë.
“Nuk është eksperienca e parë, por është më e veçanta. Është një kënaqësi dhe një nder. 8 ditë për këtë Festival janë të pamjaftueshme, njerëz kishte plot. Mesa duket kemi etje t’i tregojmë vetes sonë se kush jemi, çfarë janë këngët e vërteta popullore shqiptare sepse tani ka ardhur koha që e dëgjon të shformuar se këngët bëhen për qëllime të tjera. Ndërsa tashmë kemi mundësi të shohim kush është muzika popullore dhe kush është muzika e ahengut. Ishte moment emocional kur kam prezantuar grupin nga Zvicra dhe asnjëri nga ata nuk kishte lindur në Shqipëri, ishte emocionuese. Një Festival i tillë ka vlera të jashtëzakonshme, Festivali Folklorik ishte një emocion për mua dhe ishte kërkesa ime që të kisha 2 net prezantimi në Festival”, tha këngëtarja.
Kreu i Bashkisë së Gjirokastrës, Flamur Golemi e konsideroi Festivalin si reklamën më të mirë që i bëhet qytetit, teksa theksoi se do të kërkojë që të zhvillohet çdo vit dhe jo njëherë në 5 vite, sikurse organizohet.
“Gjirokastra i ka të gjitha, ka historinë, kulturë, por për shumë persona shqiptarë dhe të huaj, Gjirokastra njihet si qyteti ku zhvillohet edhe Festivali Folklorik. Ka risi ky festival. Në këtë javë, shumica e strukturave akomoduese kanë qenë të rezervuara dhe të gjithë këta turistë që shtohen dhe shohin edhe këtë Festival, si një atraksion tjetër, do largohen me një impresion befasues dhe është një piar i mirë për Gjirokastrën, por edhe për Shqipërinë. Gjithë ajo që po shfaqet këto ditë është një piar shumë i mirë për të gjithë Gjirokastrën. Do loboj fort që ky Festival të jetë i përvitshëm. Gjirokastra e ka të domosdoshme. Ka nevojë për pika atraktive që turistët mos ta shohin Gjirokastrën vetëm për të qëndruar për 1 apo 2 ditë”, u shpreh Golemi.
Pas 8 vitesh mungesë, Festivali Folklorik Kombëtar çeli siparin më 24 qershor dhe do të zgjasë deri më 2 korrik. Kjo e premte (30 qershor) shënon ditën e gjashtë të mbajtjes së tij, ku në skenë u ngjitën ansamblet e Qarkut të Elbasanit dhe Diasporës.
