Në përmbyllje të punimeve të samitit të Procesit të Berlinit që u mbajt në kryeqytetin shqiptar, është zhvilluar edhe inaugurimi i Piramidës.
Kryeministri Edi Rama shprehet se Piramida e transformuar si një qendër e teknologjisë është një mesazh domethënës i triumfit të lirisë mbi shtypjen ndërsa vlerësoi partneritetin me Fondacionin Shqiptaro-Amerikan.
“Piramida e Transformuar e Tiranës, Dikur një simbol i zymtë, sot një qendër e teknologjisë nga ku do lulëzojnë ëndrrat, zgjedhjet, mundësitë, perspektiva e pacunguar e gjeneratës tjetër, si një mesazh domethënës i triumfit të lirisë mbi shtypjen, i së ardhmes mbi të shkuarën. Jemi të gatshëm të vazhdojmë të bëjmë projekte të tjera”, thekson Rama.
Edhe kryetari i bashkisë së Tiranës, Erion Veliaj përshëndeti inaugurimin e piramidës tashmë si një qendër e teknologjisë. Në fjalën e tij, Veliaj theksoi se Piramida e transformuar do të jetë qendra më e madhe për mësimin dhe trajnimin digjital për fëmijët e së ardhmes.
“Për ata prej jush që nuk e njohin projektin e Piramidës, ajo nisi si një mauzelum për Enver Hoxhën. Ai vdiq në 1985, kur ne nuk kishim shumë elektricitet e frigoriferë dhe nuk ishte kaq e volitshme të kishim një ‘mumje’ në Piramidë. Ndaj ndryshoi nga një mauzelum në një muze. Dëgjova sot kryeministrin Rama që shpjegoi se ka qenë selia e NATO-s gjatë konfliktit në ish-Jugosllavi. Ishte një disko e madhe që quhej “Mumja” Por ajo që shumë njerëz nuk dinë është se unë e Edi bëmë një debat kur BE kishte vendosur zyrat këtu”.
Duke qenë se u deshën 6 vjet që ne të vendosnim, kryeministri Rama vendosi që t’ua japim fëmijëve sepse është më e lehtë për një adoleshent se çfarë duhet të bëjë sesa për BE-në që të ketë një seli”, tha Veliaj.
Piramida do t’i shërbejë plot 4000 fëmijëve që përfitojnë nga projektet e përbashkëta mes Fondacionit Shqiptaro-Amerikan dhe qeverisë shqiptare.
Projekti i rivitalizimit të Piramidës së Tiranës synoi transformimin e saj në një qendër shumë funksionale në qytet, duke siguruar hapësirë për të rinjtë dhe njerëzit që të angazhohen në art, kulturë dhe teknologji krijuese.
Kjo qendër, financim i qeverisë, bashkisë së Tiranës dhe Fondit Amerikan të Zhvillimit, ka 18 salla, ku të rinjtë të studiojnë për programe të ndryshme kompjuterike dhe 14 klasa të tjera, që janë konceptuar në natyrë.
Programet që do të ofrohen janë: animacion, zhvillimi i lojërave, kinematografia, ëeb design, muzikë, shkrim, vizatim, dizajn grafik, modelimi 3D, programim, robotikë, grafika e lëvizjes, fotografi dhe media e re.
