Xhamat e Bashkisë Kamëz nuk janë rastësisht blu, as fasada e qendrës së Kulturës. Të dy institucionet janë të vendosura në bulevardin që përshkon mes përmes qytetin, bulevard që deri në shtator të vitit 2021 mbante emrin “Bulevardi Blu”.
Simbolika e blusë në bashkinë më të afërt në distancë të kryeqytetit, e përforcuar së tepërmi nga ish-kryebashkiaku Xhelal Mziu, nuk lidhet me gjë tjetër veçse me ngjyrën partiake të qeverisjes lokale.
Në 7 mandate drejtuesit, prej krijimit si bashki në vitin 1996, pesë prej tyre i kanë përkitur Partisë Demokratike, duke e etiketuar zonën në ligjërimin politik si një bastion blu. Vetëm dy kryebashkiakë kanë qenë të Partisë Socialiste.
I pari Fran Gjini, në 2000-2003 dhe i dyti kryebashkiaku aktual, Rakip Suli. Të dy duket se janë ndihmuar nga rrethanat, për t’u bërë qytetarë të parë të Kamzës. Fran Gjini mori kryesimin pasi tërheqjes nga zgjedhjet të kundërshtarit të tij demokrat Munir Shehu, si rrjedhojë e një vendimi politik të PD të kohës.
19 vite më vonë, socialisti tjetër Rakip Suli, triumfoi pa një kandidat demokrat përballë në zgjedhjet e vitit 2019, të cilat u braktisën nga opozita.
Në përballjen e 14 majit, Rakip Suli kërkon rikonfirmim për një mandat të dytë, përballë Arjan Hoxha, që synon kryesimin nën logon e koalicionit “Bashkë Fitojmë”. Pas 4 vitesh në poltronin e numrit 1 të qytetit të Kamzës, Rakip Suli ka një bilanc.
“Sot ne kemi përfunduar rindërtimin, ku janë 426 familje të sistemuara në shtëpia individuale, si edhe përfundimi i zonës së rindërtimit në Valiasin e vjetër, 20 pallate me 270 apartamente. Kamza nuk përmbytet më, 152 km kanalizime. Sa i përket infrastrukturës, në mandatin e parë kemi përfunduar 110 km rrugë me standarde të BE. 38 objekte arsimore, 28 të përfunduara dhe 10 që janë në përfundim e sipër, çerdhe, kopshte dhe shkolla. Xhevahiri, qershia mbi tortë e këtij mandati 4-vjeçar, është ky parku i liqenit të Paskuqanit, ku ne kemi përfunduar, digën, pedonalen 5.1 km dhe falë kontributit të biznesit dhe familjarëve janë mbjellë 22000 pemë dhe falë këtij investimi, në këtë zonë është rritur me 3-fish vlera e pronës”.
Ndërsa kundërshtari i tij në garën e 14 majit, ka një listë të problemeve të qytetit, nga trafiku rrugor deri tek tenderimet abuzive. “Është një qytet që nuk ka një unazë rrethqytetëse, vuan nga trafiku i rënduar, nga ndotja. Problematika të tjera, është rikualifikimi urban. Ju keni dalë në Kamëz, është vërtetë që është investuar nën qeverisjen e PD. Është një qytet, që po të shihet nga lart është i sistemuar deri diku. Jo se nuk ka nevojë, ka nevojë për ndërhyrje, por ka shumë rrugë e rrugica, ku kanalizimet janë akoma me gropa septike. Ku ka rrugica për të cilat nuk është kujdesur asnjëherë pushteti vendor. Ky kryetari aktual, siç edhe nga gjetjet e KLSH, janë mbi 32 tendera abuzive me flamur të kuq, ndërkohë që riasfaltohet nga 2-3 herë një rrugë, pa kanalizime, e më pas çahet për t’u vendosur kanalizimi, pra abuzime nga më të ndryshmet”.
Për pasojë të migrimit të brendshëm, kryesisht e veriut të vendit, popullsia e Kamzës ka shkuar nga gati 13 mijë banorë në vitin 1992, në 104 mijë, sipas censusit të vitit 2011 e në më shumë se 130 mijë aktualisht. Mes sfidave të mandatit të dytë të dëshiruar Rakip Suli ka sistemimin e 175 familjeve të prekura nga unaza e Tiranës. “Me vullnetin e tyre kanë prishur shtëpitë, kanë firmosur marrëveshje dhe ata të kenë një shtëpi të tyren me hipotekë. Ne kemi të mbuluar 85 për qind zonën e Kamzës me ujësjellës. E treta, investime në çdo njësi”.
Projekti i kandidati i koalicionit “Bashkë Fitojmë” prek trafikun, arsimin dhe sportin. “E para, ndërtimi i unazës rrethqytetësë, apo e bypass-it, që do të çlirojë trafikun, do të ulë ndotjen mjedisore, por edhe do të gjallëroje jetën kulturore. Arsimin do të kthejmë me një turn. Sot është me dy, apo me tre turne. Do të çojmë shkollën tek komuniteti, jo komunitetin tek shkolla, pra fëmijët tanë nuk do të bëjnë nga 5 apo 6 km. Institucionet arsimore, që janë shkatërruara pa asnjë dëmtim nga tërmeti, por vetëm për shkaqe abuzive, nga 5-6 mln euro të tenderuara me tendara abuzive. Do të rikthejnë jetën sportive në Kamëz, duke krijuar akademinë e sporteve por mbi të gjitha ekipin e Kamzës. Absolutisht atë për të cilën ka nevojë Kamza, ndërtimin e një spitali bashkiak”, thotë Hoxha.
Por përse duhet votuesit e kamzës të votojnë Sulin apo Hoxhën? “Në katër vite isha pranë tyre. Dhashë besimin tek bashkia. Nga investimet që bëra është rritur vlera e pronës. Nuk bëra diferencë, i majtë apo i djathtë. Vura dorë tek të pamundurit, që kanë nevojë për dorën e secilit nga ne. Kam patur derën e hapur, tek i majti e tej i djathti, me parti e pa parti”.
“Në vizionin tim nuk ka kryetar, ka menaxher të qytetit. Unë jam qytetar i Kamzës prej 28 vitesh, unë dhe familja ime. Njoh çdo problem, çdo shqetësim, çdo hall e kam të njëjtë me të gjithë qytetarët e Kamzës. Kemi programin më të mirë dhe të konsultuar me të gjithë qytetarët e Kamzës”, tha Hoxha.
Për këtë material, A2 kontaktoi për një intervistë edhe kandidatin e Partisë Demokratike, Bilbil Bajraktari, dhe zyrën e shtypit të PD, por nuk mori një përgjigje prej tyre. Gjithkund dinamikat sociale, apo qeverisëse, mund të diktojnë qasje të reja të votuesve, për Kamzën, 14 maji do të jetë një provë, nëse bastioni i së djathtës, vijon të jetë ende i tillë.
/A2
