Presidentja e Kosovës, Vjosa Osmani, ka njoftuar sot se ka mandatuar Glauk Konjufcën, për formimin e Qeverisë së re të vendit. Në konferencë për media, Osmani pretendoi se ky veprim është bërë në përputhje të plotë me Kushtetutën e Kosovës dhe me aktgjykimet e mëhershme të Gjykatës Kushtetuese.
Ajo tha se Kushtetuta nuk i jep Presidentes asnjë hapësirë për të refuzuar emërimin e kandidatit të dytë, nëse ekziston një propozim i tillë. ‘Kushtetuta nuk i lë hapësirë dhe as diskrecion kreut të shtetit për mosemërim të kandidatit të dytë atëherë kur ka një propozim të tillë. Gjuha e përdorur në Kushtetutë është obligative – pra e detyron Presidenten e vendit që ta emërojë kandidatin e dytë,’ ka deklaruar Osmani.
Ajo iu referua aktgjykimit të Gjykatës Kushtetuese në rastin K.O. 103/14, ku tha se theksohet qartë se Neni 95, paragrafi 4 i Kushtetutës kërkon që të ketë kandidat tjetër për kryeministër, por e lë të hapur çështjen se cilës parti ose koalicion do t’i jepet mandati.
Sipas Osmanit, kjo do të thotë se Presidentja ka diskrecion vetëm në rastet kur ekzistojnë më shumë se një propozim për kryeministër, ndërsa kur ka vetëm një – ajo është e detyruar ta mandatojë atë.
‘Rrjedhimisht, sot, në përputhje me Kushtetutën dhe tri aktgjykimet e Gjykatës Kushtetuese, kam mandatuar zotin Glauk Konjufca si kandidat tjetër për kryeministër,’ deklaroi Osmani, duke shtuar se ky vendim është në përputhje edhe me përgjegjësitë që Gjykata ia njeh Presidentes në të njëjtat aktgjykime.
