Në një seancë maratonë që zgjati deri pas mesnate të së enjtes, Kuvendi ka miratuar tre ligjet e shumë diskutuara, atë për përdorimin e kanabisit për qëllime mjekësore, ligjin për studimet në Mjekësi dhe ndryshimet në ligjin e Akademisë së Shkencave.
Ligji për përdorimin e kanabisit për qëllime mjekësore u miratuar me 69 vota pro, 23 kundër, 3 abstenim, ndërsa 39 deputetët nuk votuan.
Pro ligjit për studimet në Mjekësi votuan 73 deputetë, teksa 23 u shprehën kundër, ndërsa 40 nuk kanë votuar. Ndryshimet në Ligjin e Akademisë së Shkenca kaluan me 70 pro, 23 kundër, 2 abstenim dhe 39 deputetë nuk votuan.
Seanca e djeshme parlamentare, e fundit për këtë sesion, u shoqërua me debate të forta mes opozitës dhe maxhorancës. Që në nisje të saj u regjistruan tensione, pasi opozita nuk lejoi vijimin e rendit të ditës, duke kërkuar interpelancë urgjente me kryeministrin Edi Rama dhe mocion me debat. Pas disa orë diskutimesh, kërkesat e tyre u hodhën poshtë me votim në Kuvend. Po ashtu, opozita kundërshtoi edhe të tre ligjet, duke i konsideruar si të iniciuar nga grupet klienteliste.
Ndërkohë, seanca e djeshme u shoqërua edhe me protestë nga studentët e mjekësisë, të cilët kundërshtuan ligjin. Ata bën kërkesë edhe për të qenë në pranishëm në seancë, në mënyrë që të dëgjohen argumentet e tyre, por kërkesa e tyre nuk u pranua.
Çfarë përmbajnë ligjet
Ligji për studimet në Mjekësi
Sipas këtij ligji, maturantët që fitojnë të drejtën për t’u regjistruar për mjekësi, përpara regjistrimit do të nënshkruajnë një marrëveshje me Ministrinë e Shëndetësisë, Ministrinë e Arsimit dhe Universitetin e Mjekësisë, ku do të pranojnë që të punojnë 5 vite pas diplomimit në institucionet shëndetësore shqiptare, për të tërhequr më pas diplomën pas përmbushjes së këtij detyrimi.
Për pjesën tjetër, ata që e kanë nisur universitetin dhe ata që janë në përfundim, ka dy alternativa. Ata që janë nga viti i dytë deri në vitin e katërt duhet të qëndrojnë tre vite pas diplomimit, ndërsa studentët e vitit të pestë dhe të gjashtë dy vite pas diplomimit. Nëse nuk do të duan që të qëndrojnë, alternativa tjetër është që të paguajnë koston e plotë të studimeve për vitet e studimit që i kanë mbetur.
Ligji për përdorimin e kanabisit për qëllime mjekësore
Ky ligj përcakton kuadrin rregullator për mënyrën se si do iniciohet procesi për kontrollin e kultivimit dhe përpunimit të bimës së kanabisit dhe prodhimit të nënprodukteve të saj për qëllime mjekësore dhe industriale.
Sipas ligjit, detyrohet edhe ngritja e Agjencisë Kombëtare për Kontrollin e Kanabisit. Kjo Agjenci është e ngarkuar për të kontrolluar dhe monitoruar procesin në të gjitha hallkat që nga farërat, mbjellja, korrja, tharja dhe destinacioni i fundit i kanabisit. Në ligj janë parashikuar të gjitha kushtet për aspektet e dhënies së licencave dhe lejeve për subjektet e interesuara. Parashikohet edhe ngritja e regjistrit të posaçëm të subjekteve të licencuara dhe të lejuara.
Sipërfaqja totale e lejuar për kultivimin e bimës së kanabisit për qëllime mjekësore nuk mund të jetë më e madhe se 200 hektarë në rang kombëtar. Gjithashtu, sipërfaqja e njësisë së licencës të aktivitetit për qëllime mjekësore nuk mund të jetë më e vogël se 5 hektarë dhe jo më e madhe se 10 hektarë.
Licenca jepet për një periudhë 15-vjeçare. Në raste shkeljesh, gjobat janë nga 500 mijë lekë deri në 5 milionë, si dhe ndalimi i përkohshëm i kryerjes së veprimtarisë për një periudhë nga 6 muaj deri në 3 vjet.
Në ligj janë vendosur kritere të forta për t’u pajisur me licencë, ku kriteri i parë është që kompania duhet të ketë eksperiencë 3-vjeçare në kultivimin, prodhimin, përpunimin, qarkullimin dhe administrimin e bimës së kanabisit. Kompania duhet të ketë një kapital jo më të vogël se 100.000.000 lekë apo rreth 960 mijë euro.
Ndryshimet në ligjin për Akademinë e Shkencave
Sipas ndryshimeve të bërë në ligjin për Akademinë e Shkencave, kryetarit i lejohet një mandat i dytë dhe i hiqet kufizimi i moshës 75 vjeç
Aktualisht Akademia e Shkencave, drejtohet nga Skënder Gjinushi. Mandati 4-vjeçar i Gjinushit ka përfunduar dhe ligji i ri i jep të drejtën që të rikandidojë për një mandat të dytë 4-vjeçar radhazi.
