Produktet kineze janë pjesë e përditshmërisë në Kosovë, por përplasja tregtare mes dy fuqive botërore, SHBA-së dhe Kinës, mund të sjellë ndryshime edhe për konsumatorët kosovarë. Përderisa ekspertë të ekonomisë konsiderojnë se kjo luftë tregtare mund të sjellë inflacion në Kosovë, një afarist kosovar, thotë se kjo situatë mund t’i ulë çmimet e produkteve kineze.
Telefona të mençur, kompjuter, vegla pune, veshmbathje. Shumë nga këto produkte që i përdorim çdo ditë në Kosovë, prejardhjen e kanë nga Kina. Kjo i jep Kinës rol të rëndësishëm në tregun kosovar.
Por situata globale po ndryshon me shpejtësi.
Shtetet e Bashkuara të Amerikës kanë nisur një luftë tregtare ndaj Kinës.
Fillimisht, SHBA-ja vendosi tarifë prej 34 për qind ndaj produkteve kineze, por ky ishte vetëm fillimi. Kina u përgjigj duke vendosur tarifa prej 84 për qind ndaj një sërë produktesh amerikane.
Pas kësaj mbrëmjen së mërkurës, presidenti amerikan, Donald Trump njoftoi se tarifat do të rriten menjëherë në 125 përqind ndaj mallrave kineze.
Një veprim që përshkallëzon edhe më shumë përplasjen mes dy ekonomive më të mëdha në botë.
Më 11 prill Kina ju kundërpërgjigj SHBA-së me tarifë të njëjtë prej 125 përqind për produktet amerikane.
Por çfarë lidhje ka kjo me Kosovën më shumë sesa mendohet?
Kosova importon më shumë se 12 për qind të mallrave nga Kina. Shifër kjo që renditi në vendin e tretë për nga volumi i importeve pas Gjermanisë dhe Turqisë.
Vitin e kaluar importet nga Kina kapën vlerën e mbi 748 milionë eurove.
Disa ekonomistë presin që tarifat e reja të ndikojnë edhe në Kosovë.
Duke mos e përjashtuar rritjen e inflacionit, por një këndvështrim krejt tjetër, ka shpreh biznesmeni Ramiz Kelmendi.
“Rritja e tarifave të Shteteve të Bashkuara të Amerikës ndaj Kinës ka me i liruar çmimet e Kinës. Do të shtohet konkurrenca për arsye se tregu amerikan ka qenë i përshtatshëm për Kinën. Ju e dini që edhe telefonat mobil janë prodhu në Kinë”, ka deklaruar Kelmendi.
Kelmendi pohon se kompania e tij importon çdo vit rreth 12 milionë euro mallra nga Kina dhe nuk e ka ndër mend ta ndalë këtë praktikë.
Ai do të preferonte që importin e këtyre mallrave ta bënte nga vendet evropiane apo SHBA-ja, por importi nga Kina thotë se është më leverdishëm.
Për dallim nga importi, Kosova eksporton pak në Kinë.
Vitin e kaluar, Kosova eksportoi në Kinë mallra në vlerë rreth 420 mijë euro.
Dhe aty hyjnë materiale xeherore, krom, fustane.
Pavarësisht se Kina nuk e njeh pavarësinë e Kosovës dhe nuk ka marrëdhënie diplomatike me të, tregtia mes dy vendeve është zhvilluar pa pengesa.
Kosova si një treg i vogël, por i hapur, është i ndjeshëm ndaj zhvillimeve globale.
Me rritjen e tarifave në 125 për qind, Kosova mund të përballet me çmime më të larta por edhe me mundësi të reja për të zgjeruar tregtinë me vende të tjera./Radio Evropa e Lirë/
