Daniel Serwer, profesor në Univesitetin “John Hopkins”, në një intervistë për Deutsche Welle, tha se Gjykata Speciale ka devijuar nga mandati i përcaktuar me ligjet e Kosovës dhe mbi raportin e senatorit të atëhershëm zviceran Dick Marty ku akuzoheshin krerët e UÇK-së për trafikim organesh me qënie njerëzore
Akuzat për trafikim organesh ishin bërë nga senatori Marty, që u konkretizua në një raport të Këshillit të Evropës më 2011. Pikërisht ky raport ishte pikënisja e thirrjeve për themelimin e Dhomave të Specializuara, institucion që deputetët e Kuvendit të Kosovës e themeluan më 2015.
“Unë nuk jam avokat, por në mënyrën time të të menduarit laik, gjykata është larguar dukshëm nga ky mandat. Duket se ka harruar raportin e Asamblesë Parlamentare të Këshillit të Evropës”, tha Serwer.
“Pretendimet kryesore në raportin e Këshillit të Evropës duket se janë të pabaza dhe janë lënë jashtë akuzave kundër të akuzuarve. Prokurori po ndjek akuza të tjera, më pak specifike, kundër udhëheqjes së UÇK-së, që nuk kanë lidhje me raportin e Këshillit të Evropës”, shtoi ai.
Serwer argumentoi se Kosova bëri gabim kur e pranoi Gjykatën Speciale pa marrëveshje reciproke me Serbinë, që edhe Beogradi të ketë një gjykatë me juridiksion për krimet kundër njerëzimit, krimet e luftës dhe krimet e tjera brenda Serbisë.
“Serbia ishte keqbërësi kryesor në vitet 1990. Natyra e njëanshme e Dhomave të Specializuara dhe Zyrës së Prokurorisë e pengon atë të vendosë drejtësi për krimet e kryera nga Beogradi”, potencoi ai.
Gjyqi ndaj ish-krerëve të Ushtrisë Çlirimtare të Kosovës, nisi të hënën e 3 prillit, pas më shumë se dy vjet nga konfirmimi i aktakuzës. Për tri ditë palët mbajtën deklaratat e tyre hyrëse për rastin e Hashim Thaçit, Kadri Veselit, Jakup Krasniqit dhe Rexhep Selimit.
“Ata do të dënohen. Por do të kalojë shumë kohë derisa të ketë një vendim. Paraburgimi i tyre më duket i padrejtë”, tha Serwer, teksa shtoi se gjykimi do ta bëjë edhe më të vështirë për Prishtinën që të normalizojë marrëdhëniet me Beogradin.
