Shqipëria si anëtare e përkohshme e Këshillit të Sigurimit të OKB-së, është një mundësi e mirë për Kosovën që të risillet në vëmendjen e komunitetit ndërkombëtar, ka thënë ministrja për Evropën dhe Punët e Jashtme e Republikës së Shqipërisë, Olta Xhaçka.
Në takim me Sekretarin e Përgjithshëm të OKB-së, Antonio Guterres, Xhaçka ia paraqiti prioritetet e Shqipërisë në tryezën më të lartë vendim-marrëse politike në botë, ku Shqipëria pritet të ulet në janar 2022, pas votimit të Asamblesë së Përgjithshme të OKB-së këtë të premte.
“Kosova patjetër që është çështje e interesit tonë kombëtar dhe patjetër që do të kemi një mundësi shumë të mirë përmes të qenurit në Këshillin e sigurimit për ta risjellë Kosovën në vëmendjen e komunitetit ndërkombëtar, të Këshillit të Sigurimit të Kombeve të Bashkuara. Patjetër vlen të thuhet që jemi shumë të ndërgjegjshëm për kufizimet që kemi si një vend i vogël në këtë tryezë të madhe, por kjo nuk na pengon që të bëjmë maksimumin për të avancuar ato që janë çështje të interesit kombëtar, çështjet rajonale dhe patjetër ato të paqes dhe sigurisë edhe me gjerë se sa rajoni ynë përmes prioriteteve që i kemi vendos vetes”, ka thënë ajo.
Ndërkaq, paraqiti edhe prioritetet e tjera për periudhën 2022-2023.
“Respektimi i të drejtave të gruas, si kontribut për paqe dhe siguri të qëndrueshme, me theks të posaçëm tek përdorimi i dhunës seksuale si mjet dhe taktikë lufte, respektimi i të drejtave të njeriut dhe i ligjit ndërkombëtar, lufta kundër ekstremizmit të dhunshëm, ndryshimet e klimës dhe lidhjet e tyre me rreziqet ndaj sigurisë globale dhe metodat e punës të Këshillit të Sigurimit”-janë disa nga prioritetet e Shqipërisë për mandatin 2-vjeçar si anëtare jo e përhershme e Këshillit të Sigurimit të OKB-së”, ka thënë Xhaçka.
Këshilli i Sigurimit i OKB-së përbëhet nga 15 anëtarë, nga të cilët 5 janë të përhershëm (Franca, Britania e Madhe, Shtetet e Bashkuara, Kina dhe Rusia) ndërsa 10 të tjerë zgjidhen me një mandat dy-vjeçar (5 vende çdo vit). Pas kryesimit të OSBE-së përgjatë vitit 2020, tashmë 2022-ta pritet të jetë një tjetër vit i suksesshëm për Shqipërinë në arenën ndërkombëtare. Shqipëria është bërë anëtare e OKB-së në vitin 1955.
Më 11 qershor, në Asamblenë e Përgjithshme të OKB-së votohet për pesë anëtarët e rinj jo të përhershëm: Shqipëria, Gaboni, Gana, Brazili dhe Emiratet e Bashkuara. Shqipëria shkon në këtë votim si kandidaturë konsensuale e grupit të vendeve të Evropës Lindore dhe deri tani ka marrë përkrahjen e 120 vendeve anëtare të OKB-së.
