Manipulimi i një fotografie historike të shpalljes së Pavarësisë në Vlorë kishte shërbyer si nxitje për një vramendje më të thellë. Por, ironikisht, retushuesi i panjohur i fotografisë origjinale kishte harruar pa i hequr dy duar që ishin mbështetur në ballkonin e ndërtesës historike. Është pikërisht ky tis mjegulle që mbulon historinë shqiptare, duke bërë që disa personazhe herë të shfaqen e herë të treten brenda saj.
Për shkrimtarin 65-vjeçar nga Durrësi, Bashkim Hoxha, Shqipëria këndej e andej Drinit është ende larg të bërit. Nuk e fsheh zhgënjimin kur flet për marrëveshje bashkëpunimi të mbetura veç në letër e pak vepra të denja. Në këtë fundvit, më 23 dhjetor, Hoxha ka fituar shpërblimin “Rexhai Surroi” për romanin më të mirë të vitit. Ashtu si tre vjet më parë, kur drama e tij “Askushi” kishte fituar çmimin e parë në konkursin “Katarina Josipi”, të organizuar përvitshëm nga Ministria e Kulturës në Kosovë, edhe ky çmim për shkrimtarin durrsak ishte një moment komunikimi, për të cilin ka thënë se është ëndrra e secilit autor. I cilësuar si një roman që trajton histori, megjithëse johistorik, “Kronikat e Mjegullës”, sipas vetë autorit, është një përpjekje për të ndërtuar një histori mentalitetesh.
Në një bisedë për “Kohën Ditore”, shkrimtari Bashkim Hoxha ka thënë se mjedisi social nuk është edhe aq miqësor për krijuesit. Shprehet gjithë trishtim se “dënimi më i madh letërsisë i vjen nga mungesa e vëmendjes së shoqërisë për të ose nga injorimi”. Jo pak nga krijimtaria e tij është spërkatur edhe nga ngjyrat e realitetit të gazetarisë, pjesë e së cilës ka qenë afro dy dekada.
I lindur më 1954 në Durrës, Bashkim Hoxha është një nga letrarët dhe dramaturgët më të njohur në Shqipëri. Nga pena e tij kanë dalë një sërë librash, si: “Heronjtë e Viagrës”, “Romancë në ditën e krimit”, “Gruaja e shiut”, “Lakuriq”, “Ground Zero” (“Dëshmitari i Shkretëtirës”), “Hotel Ballkan”, “Mbreti i vesës”, “Mot i keq për dashuri”, “Unë dhe Mefistofeli” (dramë), “Ftesë për gjyq”, “Këngë dashuri dhe korba”, “Njeriu tjetër”, “Një lolo dhe një mbret”, e të tjera. Prej vitesh, skenat e teatrit në Shqipëri kanë duartrokitur jo pak drama të Hoxhës, i cili deri para pak muajsh ishte drejtor artistik i teatrit “Aleksandër Moisiu” në Durrës. Për kontributin e tij letrar, qyteti i Durrësit, në 50-vjetorin e lindjes së tij, i kishte ndarë mirënjohjen “Qytetar Nderi”. Po kështu, më 30 qershor 2010, ish-presidenti i Republikës së Shqipërisë, Bamir Topi i akordoi atij titullin “Mjeshtër i Madh” gjatë një ceremonie, ku u dha edhe premiera e komedisë së tij “Udhëtimi pa vizë i një alieni”. Para publikut shqiptar, Hoxha është i njohur për komunikimin e tij të përhershëm me teleshikuesit përmes emisionit “Koha për t’u zgjuar” në News24, i cili kishte filluar qysh në vitin 1997.
