Ishte pranvera e vitit 2021 kur një dosje që pëmbante gjithë magjinë, historinë, mbijetesën dhe pasurinë që përfaqëson xhubleta shqiptare, shkoi në UNESCO.
Por, këtë fundnëntori, pak orë pas festës së Pavarësisë dhe ende nën efektin e krenarisë së flamurit kuq e zi, një tjetër pjesë e kulturës sonë, xhubleta, hyn krenare në listën e trashëgimisë botërore që mbrohet në UNESCO.
Lajmin e mirë e ka bërë publik ministrja e Kulturës, Elva Margariti.
“Një lajm i jashtëzakonshëm për trashëgiminë tonë kulturore, si dhuratë në 110-vjetorin e Pavarësisë! Pas një pune të gjatë, plot përkushtim të një grupi të madh bashkëpunëtorësh, dosja e dijebërjes artizanale të xhubletës u pranua në listën e Trashëgimisë Kulturore Jomateriale nën mbrojtjen e UNESCO-s. Xhubleta shqiptare, e lashtë 4 mijë vjet, tashmë është pasuri e gjithë njerëzimit”, shkruan ministrja e Kulturës në Facebook.
Xhubleta 4 000-vjeçare tashmë do të jetë pasuri e gjithë njerëzimit, duke shënjuar në historinë e thesareve të botës se vajzat në Alpet shqiptare vijojnë e veshin xhubletën, njëlloj si dikur në qytetërimin ilir, i cili vijon të trashëgohet ende në këto toka shqiptare.
Xhubleta shtohet në listën e pasurive si Butrinti, Gjirokastra, Berati dhe isopolifonia në listën e pasurive botërore që mbrohen nga UNESCO.
