Qytetarët e Moldavisë do i drejtohen këtë të diel kutive të votimit në zgjedhjet parlamentare. Këto zgjedhje janë cilësuar si vendimtare që do të përcaktojnë nëse vendi me 2.4 milionë banorë do të vazhdojë në rrugën e tij drejt anëtarësimit në BE apo do të kthehet në “orbitën” e Moskës, ku raportimet për ndërhyrje ruse në vend janë gjithnjë e më të shpeshta.
Presidentja pro-perëndimore, Maia Sandu, dhe partia e saj në pushtet, Aksion dhe Solidaritet (PAS), e cila mban shumicën parlamentare, përballen me një sfidë të fortë nga Blloku Zgjedhor Patriotik, një aleancë partish pro-ruse dhe nostalgjike ndaj sovjetikëve, të udhëhequra nga ish-presidenti Igor Dodon.
“Rezultatet e këtyre zgjedhjeve do të përcaktojnë të ardhmen e vendit jo vetëm për katër vitet e ardhshme, por për shumë, shumë vite që do të vijnë”, tha Igor Grosu, kreu i PAS, i cili ka të ngjarë të emërohet kryeministër nëse partia e tij fiton shumicën në zgjedhje.
Por gara pritet të jetë e ngushtë. Sondazhet sugjerojnë se PAS do të mbetet partia më e madhe, por mund të humbasë shumicën, me Bllokun Patriotik në vendin e dytë me një diferencë të ngushtë. Në një skenar të tillë, partitë më të vogla mund të luajnë një rol vendimtar.
Nën drejtimin e Sandusë, vendi ka përshpejtuar përpjekjet e tij për t’u çliruar nga ndikimi i Moskës, sidomos pas luftës në Ukrainë, por hija e Kremlinit ka qenë gjithmonë e madhe.
Autoritetet moldave thonë se Moska ka kanalizuar miliarda dollarë në parti pro-ruse, skema blerjeje votash dhe fushata propagandistike që synojnë të nxisin ndjenja anti-perëndimore.
Në Moldavi, pushteti ndahet midis presidentit të zgjedhur drejtpërdrejt dhe një kryeministri të emëruar nga parlamenti. Presidenti drejton politikën e jashtme dhe sigurinë, ndërsa kryeministri dhe kabineti menaxhojnë qeverisjen e përditshme.
Që nga pavarësia nga ish-Bashkimi Sovjetik në vitin 1991, Moldavia është luhatur midis rrugëve pro-evropiane dhe pro-ruse.
