Presidenti i Shqipërisë, Ilir Meta, nëpërmjet një postimi në Facebook ka reaguar në lidhje me protestën e shqiptarëve një ditë më parë në Washington DC, para Shtëpisë së Bardhë, të cilët i kërkuan presidentit Trump të mos lejojë Sorosin të destabilizojë një vend të NATO-s, siç është Shqipëria.
Kreu i shteti shprehu mirënjohje për protestuesit, duke thënë se përkrahja e tyre i ka shumëfishuar forcat dhe si President i Republikës, ka ‘besim tek komuniteti shqiptaro-amerikan, për të mbrojtur dhe forcuar së bashku këtë aleancë strategjike!’
“Mirënjohje të gjithë shqiptarëve të mbledhur dje në Uashington DC para Shtëpisë së Bardhë, të cilët lanë punët e tyre dhe i bashkoi shqetësimi për të ardhmen e Shqipërisë, duke konfirmuar aleancën e pathyeshme të kombit tonë me Shtetet e Bashkuara të Amerikës.
Përkrahja e tyre më shumëfishoi forcat, ndaj si President i Republikës kam besim tek komuniteti i ndershëm shqiptaro-amerikan, për të mbrojtur dhe forcuar së bashku këtë aleancë strategjike!
Shqiptarët qëndrojnë të fortë dhe të vendosur, jo për të marrë një vizë amerikane, por për të mbrojtur idealet amerikane të lirisë dhe dinjitetit njerëzor, që janë jo vetëm idealet e SHBA, por edhe të qytetërimit botëror ku ne bëjmë pjesë. Shqipëria nuk do të kthehet kurrë më në ‘one-party state’!
Ne jemi anëtarë të NATO-s dhe në zemër të kësaj Aleance është demokracia!
Zoti e bekoftë Shqipërinë!
God bless America!
God bless Albanian-American friendship!”, shkruan Meta.
