Ka zgjatur vetëm 40 minuta seanca në Gjykatën e Apelit për çështjen “Babale”, duke përfunduar me lënien në fuqi të vendimit të Shkallës së Parë për dënimin me 1 vit burg të deputetit të Partisë Demokratike, Ervin Salianji.
Në të parin komunikim me mediat pasi u njoh me vendimin, Salianji tha se “gjykata kishte ardhur me vendim të parapërgatitur” për të. Salianji në vijim akuzoi ish-ministrin e Brendshëm, Fatmir Xhafa se ka diktuar procesin gjyqësor për çështjen “Babale”, ndaj e konsideroi vendimin kryekëput politik.
“Seanca e kaluar u shty për të marrë vendimin e Gjykatës së Krimeve të Rënda për pushimin e çështjes, pra një vendim i falsifikuar për të hapur këtë proces gjyqësor për kallëzim të rremë në Shkallën e Parë. E shtyu për t’i dhënë mundësi atij që e ka ndërtuar nga fillimi deri në fund këtë proces, që është Fatmir Xhafaj, për të sjellë nëpërmjet avokatit të tij vendimmarrjen me vulë të njomë. Dhe sot Gjykata në mënyrë të paprecedente në vend që të rikthente për shkak të falsifikimit të dosjes në Gjykatën e Shkallës së parë mori vendim për ta pranuar fillimisht si provë dhe më pas për të dhënë një vendim që ishte i shkruar. Është vendimmarrje nga gjyqtarë që është njësoj sikur të të gjykojë po themi një përfaqësues të PS një seksion i PD. Nga të dhënat që kam mbledhur këto ditë, një prej gjyqtarëve superodrdiner është njeri që thotë në çdo tavolinë se do të shkojë në Gjykatë të Lartë dhe për të shkuar në Gjykatë të Lartë unë vras njeri jo më të dënoj një politikan të opozitës. Në të gjithë elementët të një dosje të kopsitur nga fillimi në fund, e bën këtë vendimmarrje politike, dënim politik. Dënimin e parë pas 32 vitesh për agjitacion-propagandë”, tha Salianji.
