Të paktën 100 000 skocezë protestuan në Glasgou, ku po zhvillohet samiti botëror për klimën, COP26.
Policia arrestoi 21 persona gjatë mitingut në favor të klimës, ndërkohë që protestuesit u larguan me forcë nga një urë kryesore, në qendër të qytetit.
Oficerët e policisë arritën të lironin edhe shumë aktivistë nga lëvizja ”Scientist Rebellion”, të cilët ishin lidhur me zinxhirë në urën ”Mbretit George V”.
Megjithatë, zyrtari i lartë i policisë, Gary Ritchie pohoi se ”dita ka kaluar kryesisht pa incidente”, megjithëse ”21 persona ishin arrestuar”.
Ritchie tha se “Glasgou ka organizuar një protestë publike, përmasat e së cilës ishin përtej çdo gjëje që shumë prej nesh mund ta mendojnë”.
”Si një nga ngjarjet kryesore të COP26, marshimi për klimën mblodhi së bashku mijëra njerëz nga e gjithë Skocia, Britania e Madhe dhe bota.
”Siç e kemi bërë të qartë gjatë gjithë kohës, qëllimi ynë ka qenë të ofrojmë një samit të sigurt dhe të garantojmë të drejtën e njerëzve për të protestuar. Megjithatë, ne kemi qenë gjithashtu të palëkundur në angazhimin tonë për të mos lejuar dëmtime në pronë, dhunë apo trazira”, përfundoi ai.
