Dy mijë trupat ushtarake të Shteteve të Bashkuara janë nisur drejt Polonisë dhe Gjermanisë si pjesë e angazhimeve në pjesën lindore të Evropës për shkak të frikës nga pushtimi i Ukrainës nga Rusia. Nga Gjermania pritet të zhvendosen në Rumani 1 mijë ushtarë tjerë amerikan.
Pentagoni ka bërë të ditur se angazhimi i 2 mijë trupave është bërë për të përforcuar përkohësisht pozicionet mbrojtëse të SHBA-së. Pentagoni gjithashtu ka përsëritur qëndrimin se këta ushtarë nuk do të hyjnë në Ukrainë.
Angazhimi i ushtrisë shtesë është në përputhje me punën e administratës së Bidenit se SHBA-ja dëshiron të zgjidh problemin pa penguar diplomacinë në krizën me Ukrainën.
SHBA-ja ka mijëra trupa ushtarake në Poloni, ndërkaq në Rumani gjendet sistemi mbrojtës i NATO-s, të cilin Rusia e ka cilësuar si kërcënim për sigurinë e saj.
Bideni nuk ka dërguar përforcime ushtarake në tri shtetet baltike të NATO-s, Estoni, Letoni dhe Lituani, të gjitha këto ish-shtete të Bashkimit Sovjetik.
Shumica e trupave të angazhuara janë nga baza Fort Bragg në Karolinën e Veriut. Këta ushtarë do të stacionohen në Poloni.
