Prokurorët në Britaninë e Madhe kanë konfirmuar për herë të parë se kanë autorizuar 21 akuza kundër Andrew dhe Tristan Tate, duke përfshirë përdhunim, dëmtim fizik të rëndë dhe trafikim njerëzor.
Siç shkruan BBC, Shërbimi i Prokurorisë së Kurorës (CPS) deklaroi se akuzat ndaj vëllezërve Tate u autorizuan në vitin 2024, përpara se të lëshohej një urdhër ekstradimi për t’i rikthyer ata nga Rumania.
Dy vëllezërit britaniko-amerikanë, janë nën hetim edhe në Rumani, ku përballen me një sërë akuzash, të cilat i mohojnë. CPS theksoi se fillimisht duhet të zgjidhen çështjet penale në Rumani, përpara se të vazhdojnë procedurat në Britani.
Sipas CPS, Andrew Tate, 38 vjeç, një influencer dhe ish-kickboxer, përballet me 10 akuza të lidhura me tre viktima të dyshuara, duke përfshirë përdhunim, dëmtim fizik të rëndë, trafikim njerëzor dhe kontroll të prostitucionit për përfitime.
Tristan Tate, 36 vjeç, përballet me 11 akuza të lidhura me një viktimë të dyshuar, duke përfshirë përdhunim, dëmtim fizik të rëndë dhe trafikim njerëzor.
Vëllezërit Tate u arrestuan për herë të parë në Rumani në dhjetor 2022, me Andrew të akuzuar për përdhunim dhe trafikim njerëzor, ndërsa Tristan i dyshuar për trafikim njerëzor. Ata i mohojnë të gjitha akuzat dhe kaluan disa muaj në arrest shtëpie.
Në gusht 2024, ata u përballën me akuza të reja, duke përfshirë marrëdhënie seksuale me një të mitur dhe trafikim të personave të mitur, të cilat gjithashtu i mohojnë.
