Të paktën 23 civilë janë vrarë në provincën jugore, Helmand, në Afganistan, dhe dhjetëra të tjerë janë plagosur kur raketat e goditën një treg të kafshëve të hënën. Lajmin e kanë konfirmuar talibanët dhe qeveria afgane.
Palët e konfliktit e kanë fajësuar njëra-tjetrën për sulmin në tregun e hapur javor në distriktin Sangin, ku qindra fshatarë nga distriktet fqinje ishin mbledhur për të tregtuar dele dhe dhi, shkruan “Reuters”.
Një zëdhënës i guvernatorit provincial tha se disa raketa të hedhura nga kryengritësit talibanë kanë rënë afër tregut të kafshëve, duke lënë të vrarë 23 persona, në mesin e të cilëve kishte edhe fëmijë.
Në anën tjetër, zëdhënësi i talibanëve, Qari Yousuf Ahmadi, tha se ushtria afgane ka hedhur bomba mortajë në shtëpiitë civile dhe në tregun e kafshëve, duke lënë të vrarë dhjetëra fshatarë.
Një tregtar që ndodhej në vendin e ngjarjes tha se ishte duke u përpjekur ta shesë një qengj kur raketat e goditën tregun. Ai tha se dy nipat e tij u vranë në këtë sulm, ndërsa djali iu plagos.
Disa banorë të Helmandit thanë se sulmi ndodhi gjatë përleshjeve të ashpra mes talibanëve dhe forcave qeveritare në zonat e banimit përreth tregut të kafshëve.
