Situatë alarmante me COVID-19 po përjeton Kosova ditëve të fundit. 27 persona kanë humbur betejën me COVID-19 për shtatë ditë, në javën që vazhdimisht shfaqi shifra rekorde të rasteve ditore. Saktësisht 10 mijë e 445 raste të reja pozitive u regjistruan për shtatë ditë.
E enjte, sot, ishte dita më e rëndë me raste të reja. U regjistruan rekord 2236 raste, ndërsa pati tetë vdekje, në ditën që është më e rënda për numrin e vdekjeve ditore që nga mesi i muajit maj.
Tri ditët e fundit paraqesin treditëshin më të rëndë që nga fillimi i pandemisë. Në vetëm 72 orë janë regjistruar plot 6111 raste të reja me COVID-19. Në këto tri ditë vdiqën 17 persona.
Në vetëm 19 ditët e para të muajit gusht janë regjistruar 37 vdekje. Kjo shifër tejkalon numrin e vdekjeve që u regjistruan në muajt qershor e korrik bashkë.
Me shifrat alarmante të kësaj jave numri i rasteve aktive ka mbërritur në 14 mijë e 249. Numri i rasteve aktive që është sot, në krahasim me një muaj më herët, paraqet rritje prej 137 herë. Më 19 korrik ishin 104 raste aktive me COVID-19.
Sa i përket komunave, Prishtina prin me 2760 raste aktive, sipas uebfaqes së Ministrisë së Shëndetësisë.
Javët e fundit janë regjistruar vlera të larta edhe të infektimit të fëmijëve. Sot nga 2236 rastet e reja, 37 ishin të grupmoshës deri nëntë vjeç.
Rritja e rasteve ka bërë që spitalet dhe klinikat në vend të mbushen me pacientë me COVID-19. Në klinikat COVID dhe spitalet e përgjithshme, sipas raportit ditor të Shërbimit Spitalor Klinik dhe Universitar të Kosovës, janë 527 pacientë të konfirmuar COVID-19 pozitivë. Nga ta 470 janë në oksigjenoterapi, ndërsa 26 pacientë janë në gjendje të rëndë shëndetësore.
Shifrat e larta kanë bërë që Qeveria të marrë masa të reja, duke mbyllur nga nesër klubet e natës dhe duke ndaluar organizimin e ahengjeve.
Krahas shifrave rekorde, në gusht ka pasur ngritje të madhe edhe të vaksinimeve ditore. Mbi 662 mijë doza të vaksinave anti-COVID janë administruar deri tash. Rreth 227 mijë qytetarë tashmë i kanë marrë të dy dozat, ndërsa 210 mijë nga një. Java e fundit ka regjistruar çdo ditë rreth 20 mijë vaksinime.
Në shifra totale, që nga fillimi i pandemisë e deri tash në Kosovë janë regjistruar të infektuar 123 mijë e 98 qytetarë. Prej tyre 2303 kanë humbur jetën. Në përqindje kjo nënkupton që 1.87 për qind e të infektuarve kanë vdekur. Nga 123 mijë të infektuarit janë shëruar 106 mijë e 546 persona.
