Ishte ora 3:54 e mëngjesit të së martës momenti kur e gjithë Shqipëria u shkund për 30 sekonda.
Mjaftuan pak sekonda dhe disa lëkundje në seri që këtë të mërkurë Shqipëria të hyjë në ditë zie kombëtare. 31 jetë njerëzish u shuan. Disa në vend, disa pas orësh lufte e kërkimi nëpër gërmadha.
Qindra persona kanë mbetur jashtë banesave të tyre. Në zonat më të prekura, Durrës e Thumanë, qindra janë sot pa shtëpi. Po ashtu qindra shqiptarë në Durrës, Tiranë, Krujë e më gjetkë, kanë zgjedhur që natën ta kalojnë në parehatinë e një kafeneje në katin e parë, në stadium apo edhe në sediljet e makinave. Dhimbja është e madhe, por duket se për shumë shqiptarë ende më e madhe është frika.
Mbi 650 persona kanë shkuar në spital në harkun kohor të rreth 30 orëve të vështira që kanë përjetuar qytetarët e Shqipërisë.
Nga ana tjetër ka ende shumë punë, pasi akoma ka njerëz nën rrënoja. Në Durrës e Thumanë ka shqiptarë që ndodhen nën gërmadhat e banesave që u rrëzuan nga tërmeti 6.4 i shkallës rihter. Puna nuk ka ndaluar dhe dhjetëra grupe shpëtimi kanë qëndruar nqë përpjekje për të gjetur një frymë të gjallë. Tashmë lufta mbetet ajo me kohën, pasi ata shqiptarë që kanë mbetur nën rrënoja s’mund të ‘presin’ përjetësisht.
Të vdekurit
Tre viktima u nxorën nga pallati 6 katësh që u shemb në Durrës; 5 viktima në rrënojat e 3 pallateve që u shembën në Thumanë; 4 viktima janë nxjerrë nga rrënojat në Kënetë në Durrës.
Në vilën që u shemb në Kënetë, tre viktima në familjen Lala por nga kjo familje u shpëtua një 17-vjeccar.
Një viktimë u gjet në rrënojat e Kavalishencës në Durrës. Bëhet fjalë për policin Bajram Hadërmataj. Një person nga paniku u hodh nga pallati në Kurbin duke humbur jetën.
Dy të rinj nga Kosova u nxorën të pajetë nga rrënojat e ‘Tropikalit’. Në Thumanë e Durrës
Mëngjesin e sotëm u nxor i vdekur edhe 32-vjeçari Klement Çupi, ndërkohë në spital ka humbur jetën 31-vjeçari Saimir Greku, i cili nuk mundi t’i mbijetojë plagëve të marra.
Çifti i bashkëshortëve, Pëllumb dhe Çelike Greku janë nxjerrë nga rrënojat e pallatit 6-katësh ku banonin./Express/
