Zëdhënësi i fushatës së PD, Andi Mustafaj, i ftuar në televizionin e familjes Berisha, thotë se SPAK po përfshihet në fushatë.
Ai tha se lobimi për Berishën, është përpjekje për të thyer rrethimin ndërkombëtar.
“Ka shumë kohë që ne e kërkojmë që PD duhet të thyejë rrethimin ndërkombëtar të saj. E kemi thënë këtë kudo ku kemi patur mundësi. Mazhoranca ka krijuar një rreth, një qark në të cilin e ka futur opozitën shqiptare.
Dhe u bë një kohë e gjatë që PD e ka thyer këtë rrethim. Ne e kemi kërkuar dhe ja kemi arritur me rezolutat e CDI, qëndrimet e Parlamentit Evropian me vajtjen e Zotit Berisha në Berlin, me shkuarjen nesër në Valencia.
Pra është pjesë e një strategjie të plotë, të gjerë të PD, që unë e kam quajtur ç’kompleksimi dhe dalja nga naiviteti që partnerët ndërkombëtare do të marrin vendimet e duhura thjesht sepse janë të duhurat.
Fatkeqësisht realiteti politik, gjeopolitik, por edhe lobimi që ka bërë Partia Socialiste nëpërmjet fondacionit Soros dhe miqve të tjerë të saj ka bërë që të huajt na kanë parë gjithmonë në një pasqyrë të thyer dhe nuk e kanë kuptuar dhe nuk e kanë ditur realitetin shqiptar.
Kështu që ne jemi në vazhdën logjike të një strategjie me një intensitet në rritje të përhapjes së mesazhit të Partisë Demokratike dhe të njohjes së realitetit shqiptar nëpër botë. Neve këtu, për sa i përket Shqipërisë në mesazhet politike, kemi disa gjera që i dimë, e disa gjera që janë të reja. Ato që i dimë, që propaganda e PS është gati të bëjë çdo gjë përkundër nesh. Ka tentuar të na asgjësojë, të na zhdukë. Këtë e dimë nuk ka asgjë të re Këtu.
Që SPAK-u në rastin konkret siç kanë qenë raste të tjera nuk ka ndërgjegjen profesionale të pasojave të veprimtarisë së saj. Sepse unë do të thoja që SPAK-u nuk është organ politik, është organ i drejtësisë por pasojat e vendimeve të saj janë plotësisht politike. Ne këtë e dimë. Pra SPAK, në qoftë se donte ta hetonte kontratën e lobimit, mund të priste dy jave që të mos ndërhynte drejtpërdrejt në fushatën elektorale shqiptare. Sepse krijon pasoja mbi demokracinë që ndoshta mund të jenë të parekuperushme. Në rastin tonë ne i tejkalojmë. Sepse kemi treguar se i tejkalojmë. Por nuk mbajti askush përgjegjësi për 333 ditët e paraburgimit të zotit Berisha. Që gjymtuan, opozitën dhe demokracinë shqiptare. Nuk pati asnjë përgjegjës ndaj kësaj. këto gjera nuk janë të reja. Dhe ne e dinim që do ti bënim ballë një beteje shume të vështirë. Dhe në këtë drejtim unë nuk kam surpriza.
Ajo që është surprizuese për qeverinë që duhet thënë është që ne kemi dalë nga ky kompleks i inferioritetit që kemi pasur. Psherëtima e PD sot është oshtimë që ata i verbon, që ata i shurdhon. Dhe kanë arritur në këtë pikë që ndihet frika e tyre. Dhe thirrja ime këtu është për të gjithë demokratët dhe gjithë qytetarët që na dëgjojnë është të vazhdojnë fushatën elektorale dhe mos të shpërqendrohen. Sepse kjo tregon se fushata jonë elektorale është ajo e duhura.
Kundërshtari kërkon të na çojë gjithmonë përposhtë, që të trajtojmë çështje që nuk duhen trajtuar as në fushata elektorale por as në biseda kafenesh të përçmimit të uljes së qytetarëve. Neve kemi qëndruar tek programi, neve kemi qëndruar tek kandidati ynë për kryeministër. Ne kemi qëndruar tek kandidatët tanë për deputetë. Këtë duhet të bëjmë. Nuk duhet të shpërqendrohemi nga fushata elektorale dhe kjo është pjesa më thelbësore dhe kjo tregon se është rruga e duhur. Kjo tregon se ne jemi gjithmonë e më pranë fitores me 11 maj”, tha ai.
