Këtë të premte 74 familjet Durrasake dolën në protestë para godinës së Kryeministrisë, duke kundërshtuar vendimin e autoriteteve për shembjen e banesave e zonës historike të qytetit.
Ata deklarojnë se janë njoftuar papritur për prishjen e shtëpive, të cilat do të zëvendësohen me një lulishte publike, pa marrë dakordësinë e tyre.
Protestuesit shprehen se procesi i shpronësimit po kryhet me çmime referencë që nuk pasqyrojnë vlerën reale të pronave dhe nuk u lejon blerjen e një banese të re. Ata kanë vetëm tre muaj afat për të plotësuar dokumentacionin e nevojshëm, duke u ndjerë të pambrojtur dhe të injoruar nga institucionet.
Më tej, protestës i është bashkuar kandidati për deputet në qarkun e Durrësit, Aulon Kalaja, i cili përmes rrjeteve sociale e ka cilësuar projektin si “mafioz” dhe ka akuzuar qeverinë, Bashkinë e Durrësit dhe AADF-në për shkatërrimin e amfiteatrit të Dyrrahut dhe objekteve historike: “Por sillen si pushtues duke shkatërruar çdo kala, Butrintin, Durrësin, radhën e kanë të tjerat. Turp e faqe e zezë!”
Banorët paralajmërojnë se do të vazhdojnë peticionin dhe protestat deri sa të gjendet një zgjidhje e drejtë për shtëpitë e tyre.
