Bota shënon sot 78 vite nga fundi i Luftës së Dytë Botërore, një ngjarje historike e cila për gjashtë vite shfarosi rreth 3 për qind të popullatës botërore apo mbi 70 milionë njerëz.
Më 2 Shtator 1945, vendet aleate dhe Japonia firmosën zyrtarisht disfatën e Perandorisë së Japonisë. Dokumenti u përgatit nga gjenerali amerikan Douglas MacArthur.
Duke iu drejtuar përfaqësuesve të aleatëve të mbledhur në anije, gjenerali MacArthur tha se sikurse mbarë njerëzimi, ai shpresonte që pas kësaj ngjarjeje kaq të rëndësishme, një botë më e mirë do të dilte nga gjaku dhe tmerret e së kaluarës, një botë që do t’i përkushtohej dinjitetit të njeriut dhe plotësimit të dëshirave më të shtrenjta të njerëzimit, lirisë, tolerancës dhe drejtësisë.
Lufta e Dytë Botërore ishte një konflikt global që nisi më 1 shtator 1939 me fillimin e pushtimit të Polonisë nga Gjermania.
Përgjatë verës së atij viti, Britania e Madhe, Franca dhe Bashkimi Sovjetik kishin hyrë në negociata për të formuar një aleancë tripalëshe kundër Gjermanisë, por bisedimet u anuluan kur Polonia refuzoi t’u japë trupave sovjetike të drejtën të hynin në territorin e vet, pasi kjo shihej prej tyre si një lloj “pushtimi”.
Pasi Gjermania hyri në Poloni, më 3 shtator Franca dhe Britania i shpallën luftë Gjermanisë.
Konflikti u zhvillua midis Aleatëve me sovjetikët dhe Boshtit Nazist, i cili përbëhej nga Italia, Gjermania dhe Japonia.
Nga Bashkimi Sovjetik vlerësohet se u vranë rreth 27 milionë njerëz gjatë kësaj periudhe, nga të cilët 8,7 milionë ushtarakë dhe 19 milionë civilë. Gjermania vetë pësoi 5,3 milionë humbje mes radhëve ushtarake, shumica me Frontin e Lindjes dhe gjatë betejave përfundimtare në Gjermani.
