Një restorant në qytetin e Beratit ka arritur të fshehë të ardhura në vlerën e rreth 930 mijë eurove gjatë një periudhe gjashtë-vjeçare, nga viti 2019 deri në 2025. Ky rast flagrant i evazionit fiskal u zbulua nga Administrata Tatimore pas një kontrolli të detajuar, i cili nxori në pah një sërë shkeljesh ligjore.
Ndër shkeljet e konstatuara nga Task-Forca në terren përfshihen mallra pa fatura. Pjesë të inventarit apo furnizimeve të restorantit nuk rezultonin të pajisura me dokumentacionin përkatës tatimor.
Nga ana tjetër klientëve nuk u janë lëshuar faturat për shërbimet e konsumuar, duke mos raportuar të ardhurat reale, si dhe është vënë re mungesa e autofaturave për transaksione të caktuara që kërkojnë këtë dokumentacion.
Administrata Tatimore ka zbuluar edhe blloqe jotatimore, përdorimi apo posedimi i pajisjeve apo dokumenteve që nuk janë në përputhje me legjislacionin tatimor.
Por ajo që ka qenë më e dukshmja ka qenë fakti se, sipas Administratës Tatimore, restoranti zhvillonte aktivitet ekonomik pa regjistrim në TVSH.
Restoranti ka zhvilluar veprimtari ekonomike për vite me radhë pa u regjistruar si subjekt i Tatimit mbi Vlerën e Shtuar (TVSH).
Për pasojë, Administrata Tatimore ka bllokuar aktivitetin e këtij subjekti dhe i ka sekuestruar pajisjen kompjuterike, e cila shërbeu për të dokumentuar fshehjen e të ardhurave.
“Tatimpaguesi nuk kishte deklaruar në sistemin tatimor shumën e konsiderueshme prej 930 mijë eurosh të përfituara nga aktiviteti i tij.”, njofton Administrata Tatimore.
Ky aksion vjen në kuadër të Planit të Turizmit dhe përpjekjeve të Administratës Tatimore për të siguruar një treg të rregullt, të formalizuar dhe të bazuar në konkurrencë të ndershme. Përveç kontrolleve në sektorin e hoteleri-restoranteve, administrata po analizon edhe pagat e deklaruara të punonjësve në sektorin e turizmit, duke i krahasuar me pagën minimale referencë, me qëllim rritjen e kontributeve për sigurimet shoqërore dhe pensionet.
“Administrata Tatimore apelon të gjitha bizneset të respektojnë legjislacionin në fuqi dhe të përmbushin detyrimet e tyre tatimore, në mënyrë që të shmangin masat ndëshkuese që vijnë nga moszbatimi i ligjit.”, thuhet në njoftimin për shtyp të Drejtorisë së Përgjithshme të Tatimeve.
