“97% e qytetarëve shqiptarëve mbështesin anëtarësimin në BE, ndërsa 85% e mbështesin plotësisht”.
Kreu i Delegacionit të Bashkimit Evropian në Tiranë, ambasadori, Luigi Soreca prezantoi sot në një konferencë për shtyp gjetjet kryesore të sondazhit vjetor mbi perceptimet për BE-në në Shqipëri
Soreca tha se, “88% e shqiptarëve kanë mendim pozitiv për Bashkimin Evropian, ndërsa 63% shumë pozitiv”.
“97% e qytetarëve shqiptarë mbështesin anëtarësimin në BE, ndërsa 85% e mbështesin plotësisht. Mund të shikoni një rritje madhore nga viti i shkuar kur ishin 93%. Për shqiptarët nuk duket të ketë plan B, përveç anëtarësimit në BE. Kjo tregon që ndjesia e shqiptarëve ndaj BE nuk ka ndryshuar pavarësisht asaj që ndodhi tetorin e shkuar. Kjo tregon që kjo është përgjegjësi e madhe si për BE, dhe për shtetet anëtare”, tha Soreca.
Soreca u shpreh se sipas sondazhit kërkesat kryesore të shqiptarëve janë ulja e korrupsionit, punësimi, Reforma në Drejtësi, rritje të stabilitetit dhe sigurisë publike.
“Shqiptarët tregojnë me këto shifra që politikanët duhet të bëhen bashkë për stabilitetin e vendit dhe për Shqipërinë dhe të ardhmen e saj në BE. Ulja në tryezë për reformën zgjedhore ishte një fillim i mbarë për vitin 2020, ku të gjitha palët po punojnë me njëra-tjetrën. Në lidhje me kushtet që BE ka vënë për Shqipërinë qytetarët shqiptarë kanë përgjithësisht mendim pozitiv. Nga 10 vetë, 8 besojnë se BE e trajton Shqipërinë në mënyrë të drejtë. Ndërsa 77% nuk mendojnë që BE e trajton Shqipërinë më keq se vendet tjera në rajon”, tha Soreca.
“91% e qytetarëve shqiptarë mendojnë se kushtet që ka përcaktuar BE për Shqipërinë janë të mira për qytetarë të saj. Kjo konfirmon atë që themi ne, që reformat duhen bërë, jo se kërkohen nga BE, por sepse ato janë në radhë të parë të mira për qytetarët shqiptarë”, u shpreh Soreca.
“54% e qytetarëve shqiptarë besojnë se Shqipëria është gati të nisë negociatat në mars 2020”, u shpreh ai.
“92% mendojnë se jeta e tyre do të përmirësohet me avancimin drejt BE. Ndërsa 89% mbështesin Reformën në Drejtësi”, tha Soreca.
“Shqiptarët kanë nevojë për më shumë informacion sa i takon situatës ekonomike dhe standardit të jetesës”, theksoi Soreca./ATSH/
