Tetë persona janë marrë deri tani në pyetje për dosjen 339, pas përgjimeve të publikuara nga Bild. Që prej së enjtes së kaluar, ndërsa kryeprokurorja Arta Marku raportonte në Kuvend, dy prokurorë të çështjes, Vladimir Mara dhe Dritan Bremçi kanë marrë në pyetje deputetin socialist të Shijakut, Ilir Ndraxhi.
Një tjetër person i marrë në pyetje është edhe Ani Dyrmishi, ish-drejtor i Hipotkës së Durrësit në kohën kur janë përgjuar bisedat.
Në 5 qershor Bild publikoi 6 audiopërgjimet e bisedave të Astrit Avdylajt kreu i grupit kriminal në Shijak.
Përgjimet tregonin angazhimin e tij për të siguruar vota për PS si dhe për të emëruar në listën e PS si kandidat për deputet Ilir Ndraxhi.
