Humbja e kampiones së katërfishtë të botës, Gjermanisë, nga Maqedonia e Veriut, shkaktoi thirrje masive të enjten për largimin e menjëhershëm të përzgjedhësit Joachim Loew, në vend që për ndarje të pritet deri pas Kampionatit Evropian të kësaj vere.
Goran Pandev e kaloi Maqedoninë e Veriut në epërsi në ndeshjen kualifikuese për kampionatin botëror “Katari 2022” të mërkurën mbrëma, pak para përfundimit të pjesëlojës së parë. Ilkay Guendogan barazoi për Gjermaninë nga penalltia, por ishte mesfushori Eljif Elmas që shënoi në fund të ndeshjes golin e fitores për Maqedoninë e Veriut. Ndeshja në Duisburg përfundoi me triumfin e Maqedonisë së Veriut (2:1) dhe shkaktoi zemërim të madh te gjermanët.
Loew, i cili e udhëhoqi Gjermaninë drejt titullit të botës në vitin 2014, ka pasur një varg rezultatesh të dobëta pothuajse që atëherë. Ai njoftoi muajin e shkuar se do të largohet nga posti i përzgjedhësit pas përfundimit të “Euro 2020”.
Mirëpo humbja e fundit ka bërë që të kërkohet largimi i menjëhershëm i Loewit, i cili është në krye të Gjermanisë prej vitit 2006. “Bild”, gazeta më e lexuar e Gjermanisë, tha se vendimi i Loewit duhet të ndryshohet pas humbjes nga përfaqësuesja që renditet e 65-ta në ranglistën botërore të FIFA-s.
“Ka mbaruar Jogi”, shkruan në titull të artikullit të “Bild” ku kërkohet ndarja me selektorin. “Magjia që Loew nxori gjatë Kupës së Botës (2014) për fat të keq është zhdukur. Arritjet e tij për futbollin gjerman nuk mund të vihen në dyshim, por koha e tij ka kaluar”.
Loew është përpjekur të krijojë një ekip të ri pa yje, veteranë, të tillë si sulmuesi Thomas Mueller dhe qendërmbrojtësi Jerome Boateng, të cilët i largoi pas eliminimit të hershëm të Gjermanisë në kampionatin botëror “Rusia 2018”. Revista “Kicker” shkroi se projekti i rindërtimit të ekipit nuk po funksionon.
“Ky ekip kombëtar gjerman i sapoformuar po kërkon akoma drejtim dhe po përpiqet të gjejë rrugën e vet … si në këmbët ashtu edhe në kokat e lojtarëve”, shkruhej në artikull. Sipas “Kicker”, shpjegimi i Loewit se lojtarët e tij ishin të lodhur, thjesht nuk mund të arsyetohet në asnjë mënyrë. “Ky arsyetim nuk kapërdihet përballë kundërshtarëve të atij niveli”.
Uebfaqja “Sport1” shkroi se ekipi e kishte “çnderuar veten” me humbjen nga Maqedonia e Veriut. Ky medium ishte veçanërisht kritik ndaj sulmuesit të Chelseat, Timo Werner, i cili humbi një rast të artë.
“Disa lojtarë nuk po arrijnë nivelin e tyre të zakonshëm”, shkroi “Sport1.de”.
Paraqitja e dobët e Gjermanisë vetëm do të shtojë kritikat në argumentin që sulmuesi 31-vjeçar, Mueller ka mbetur jashtë ekipit. Kritikët po insistojnë që Mueller patjetër duhet të rikthehet te Gjermania pas formës së mirë që po tregon këtë edicion dhe sezonin e shkuar ku fitoi të gjithë trofetë e mundshëm me Bayern Munichun. Mueller po shihet si lojtar i rëndësishëm për Gjermaninë në Kampionatin Evropian duke pasur parasysh faktin se është pjesë e një grupi të vështirë me Portugalinë, Francën e Hungarinë. Kritikat dhe thirrjet më të mëdha erdhën nga Uli Hoeness, kryetar nderi i Bayern Munichu.
“Mueller duhet të jetë në ekip, ai ende mund të shënojë gola dhe ai mund të ndihmojë çdo skuadër në botë që të dalë nga situatat e vështira”, tha Hoeness.
Ndërkohë Loew këmbënguli se ai nuk e ka humbur besimin në ekipin e tij për Kampionatin Evropian dhe u bëri thirrje të gjithë gjermanëve që të qëndrojnë prapa dhe të ofrojnë mbështetje, pavarësisht humbjes nga Maqedonia e Veriut.
“Ne nuk duhet ta humbasim besimin”, tha Loew. “Në ditët dhe javët e ardhshme ne do të kontrollojmë gjithçka edhe një herë”.
Për dallim prej Gjermanisë, në Maqedoninë e Veriut triumfi në Duisburg është vlerësuar historik. Maqedonia e Veriut për herë të parë do të paraqitet në Kampionatin Evropian këtë verë pasi arriti të kualifikohet nëpërmjet plejofit të Ligës së Kombeve në nëntor të vitit të shkuar.
“Ne kurrë nuk e kemi mposhtur një ekip me kaq shumë tituj. Këta djem e kanë bërë krenare Maqedoninë e Veriut”, ishin disa prej fjalëve të përzgjedhësit Igor Angelovski.
Me këtë triumf, Maqedonia e Veriut është e dyta në Grupin J eliminator për kampionatin botëror “Katari 2022” me gjashtë pikë të mbledhura, sa i ka edhe Gjermania në pozitën e tretë. Ndërkohë, Armenia i prin grupit me nëntë pikë.
Në Evropian, Maqedonia e Veriut është pjesë e Grupit C së bashku me Holandën, Ukrainën e Austrinë.
