Shteti i Perusë gati ka trefishuar shifrat e vdekjeve nga COVID-19, pas një rishikimi të të dhënave nga ana e Qeverisë. Me shifrën që ka shkuar në 180 mijë, shteti tani është me shkallën më të lartë të vdekjeve për kokë banori, sipas të dhënave nga Universiteti “Johns Hopkins”.
Peruja është ndër shtetet më të goditura në Amerikën Latine gjatë pandemisë, me ngarkesë të pacientëve e kërkesë të lartë për oksigjen.
Deri të dielën numri i vdekjeve ishte 69 mijë e 342, pjesërisht për shkak të mungesës së testimeve për të konfirmuar nëse një person ka vdekur si pasojë e virusit apo diçka tjetër.
Sipas të dhënave të Universitetit “Johns Hopkins”, Hungaria ka shkallën më të lartë të vdekjeve nga COVId-19 për kokë banori, me rreth 300 për 100 mijë. Me përditësimin e të dhënave, Peruja tani ka shkuar në 500 të vdekur për 100 mijë banorë.
“Ne mendojmë se është detyrë e jona që të përditësojmë informacionin”, ka thënë kryeministrja e Perusë, Violeta Bermudez, në një konferencë për media.
